2014 च्या पराभवाचा वचपा काढला, सुनील तटकरेंची अनंत गीतेंवर मात

अलिबाग : रायगड लोकसभा मतदारसंघातील राष्ट्रवादी काँग्रेसचे उमेदवार सुनील तटकरे यांचा विजय झाला आहे. शिवसेनेचे नेते आणि केंद्रीय मंत्री अनंत गीते यांचा सुनील तटकरेंनी पराभव केला. 2014 साली सुनील तटकरे यांचा अवघ्या 2100 मतांनी पराभव झाला होता. या परभवाचा वचपा अखेर सुनील तटकरे यांनी काढला आहे.

रायगड लोकसभा मतदारसंघात शिवसेनेचे केंद्रीय मंत्री अनंत गीते आणि राष्ट्रवादीचे राष्ट्रीय सरचिटणीस सुनील तटकरे यांच्यात लढत झाली. 2014 साली मोदीलाट असूनही सुनील तटकरे यांनी अनंत गीते यांनी जेरीस आणलं होतं. शिवाय, तटकरेंनी निसटता पराभव स्वीकारला होता. यंदा पुन्हा गीते विरुद्ध तटकरे लढत झाल्याने निवडणुकीला रंगत आली. त्यात मनसे अध्यक्ष राज ठाकरे यांनी महाडमध्ये सभा घेतल्याने निकालाची उत्सुकता आणखी वाढली होती.

अनंत गीते हे शिवसेनेचे वरिष्ठ नेते आहेत. केंद्रीय अवजड उद्योग मंत्रालयाची जबाबदारी त्यांच्यावर देण्यात आली होती. रायगडमधून 2009 आणि 2014 या दोनवेळा अनंत गीते रायगड लोकसभा मतदारसंघातून खासदार म्हणून निवडून गेले होते. 2014 साली राष्ट्रवादीचे तत्कालीन प्रदेशाध्यक्ष सुनील तटकरे यांचा पराभव त्यांनी केला होता. अत्यंत कमी मतांच्या फरकाने अनंत गीते विजयी झाले होते.