क्रिकेटपटूंनाही आता मिळणार मातृत्व रजा

मुंबई : नोकरी करणाऱ्या महिलांना अनेकदा गर्भवती असल्याने आपलं करिअर सोडावं लागतं. काहींना नाईलाज असतो, तर काही आपल्या मुलांचा सांभाळ करण्यासाठी करिअरला स्वत:हून बाजूला सारतात. तर काहींना कंपनीच्या मातृत्त्व रजेचे धोरण योग्य नसल्याने नोकरी गमवावी लागते (Parental Leave Scheme).

अनेक काळापासून चालत आलेल्या या मातृत्त्व रजा धोरणांना अपवाद म्हणून ऑस्ट्रेलिया क्रिकेट बोर्डाने एक नवं धोरणं जगासमोर ठेवलं आहे. ऑस्ट्रेलिया क्रिकेट बोर्डाने महिला खेळाडूंना एका वर्षाची मातृत्त्व रजा देण्याचा निर्णय घेतला आहे. शिवाय, संपूर्ण वर्ष त्यांना पगारही देणार आहे. जेष्ठ खेळाडू जेस डफिन ही ऑस्ट्रेलिया क्रिकेट बोर्डाच्या या मातृत्त्व रजा धोरणांचा लाभ घेणारी पहिली महिला क्रिकेटर ठरली आहे (Jess Duffin).

जेस डफिनने बोर्डाला ती गर्भवती असल्याची माहिती दिली. त्यानंतर बोर्डाने त्यांना एक वर्षाची रजा आणि संपूर्ण वर्षाचा पगार देण्याचा निर्णय घेतला. यासोबतच यावर्षी फेब्रुवारी महिन्यात होत असलेल्या महिला टी-20 विश्वचषकात 30 वर्षीय जेस डफिन ही गर्भवती असल्याने खेळू शकणार नाही.

मात्र, भारतीय क्रिकेट नियामक मंडळ (बीसीसीआय) मध्ये अशा प्रकारचं कुठलंही धोरण नाही. त्यामुळे जर भविष्यात कुठल्या महिला खेळाडूला अशा प्रकारची गरज पडली तर बीसीसीआय काय निर्णय घेणार हे पाहावं लागणार आहे. मात्र, ऑस्ट्रेलिया क्रिकेट बोर्डाने घेतलेला हा निर्णय खरंच कौतुकास्पद आहे.

Australia Cricket parental leave scheme