मुंबई : नाशिक पदवीधर मतदार संघातून अपक्ष उमेदवार म्हणून सत्यजित तांबे यांनी निवडणूक लढवली. या निवडणुकीत त्यांचा दणदणीत विजय झाला. सत्यजित तांबे यांच्या विजयानंतर राष्ट्रवादीचे आमदार अमोल मिटकरी यांनी ट्विट केले आहे. सत्यजित तांबे यांच्या विजयाचे अभिनंदन करताना त्यांनी वेलकम असे ट्विट केले आहे. संघर्षाच्या काळात संयम ठेवून कसं जिंकता येतं हा नवीन परिपाठ, तसेच जवळचा मित्र गमावल्यानंतर आनंदोत्सव साजरा न करण्याचा आपला निर्णय हा नव्या पिढीसमोर आदर्श म्हणावा लागेल. आपले मनःपूर्वक स्वागत..वेलकम…, असे देखील त्यांनी त्यांच्याट्विटमध्ये म्हटले आहे. नाशिक पदवीधर मतदारसंघात अपक्ष उमेदवार सत्यजित तांबे आणि महाविकास आघाडीच्या उमेदवार शुभांगी पाटील यांच्यात थेट लढत होती. या निवडणुकीत शुभांगी पाटील यांनी चांगलं आव्हान निर्माण केलं होतं. पण त्यांचा पराभव झाला. सत्यजित तांबे हे भरघोस मतांनी विजयी झाले. सत्यजित तांबे यांनी 68 हजार 999 मतं मिळवली आणि ते विजयी झालेत. मात्र या विजयानंतरही सत्यजित तांबे यांनी त्यांच्या कार्यकर्त्यांना कोणताही आनंदोत्सव साजरा करू नका असे सांगितले होते. या पार्श्वभूमीवर अमोल मिटकरी यांनी ट्विट केले आहे.