धुरंधर पहा, पण आम्हालाही संधी द्या..; फ्लॉप चित्रपटाच्या हिरोची विनंती; म्हणाला “आम्ही कुठे जायचं?”
बॉक्स ऑफिसवर फ्लॉप झालेल्या या चित्रपटाच्या हिरोने प्रेक्षकांसमोर ही विनंती केली आहे. आता हा चित्रपट ओटीटीवर स्ट्रीम होत आहे. या चित्रपटात अभिनेते संजय कपूर यांची मुलगी शनाया कपूरने मुख्य भूमिका साकारली होती.
गेल्या वर्षी डिसेंबर महिन्यात थिएटरमध्ये प्रदर्शित झालेल्या ‘धुरंधर’ या चित्रपटाने कमाईचे सर्व रेकॉर्ड्स मोडले. धुरंधरच्या यशासमोर इतर सर्व चित्रपट लहान वाटू लागले. ‘धुरंधर’नंतर सनी देओलच्या ‘बॉर्डर 2’नेही बॉक्स ऑफिसवर चांगली कमाई केली. परंतु या मोठ्या चित्रपटांनी थिएटरमध्ये आलेल्या छोट्या आणि कमी बजेटच्या चित्रपटांचा खेळ खल्लास केला. काही आठवड्यांपूर्वी प्रदर्शित झालेल्या शनाया कपूर आणि आदर्श गौरव यांच्या ‘तू या मैं’ या चित्रपटाने त्याचा चांगलाच अनुभव घेतला आहे. या चित्रपटाची कमाई अपेक्षेपेक्षा खूपच कमी झाली. आता त्यावर चित्रपटात मुख्य भूमिका साकारणाऱ्या आदर्शने आपलं मत मांडलं आहे. लोकांनी चित्रपट थेट नाकारण्यापेक्षा आधी एक संधी तरी द्यावी, असं तो म्हणाला.
याविषयी ‘झूम’ला दिलेल्या मुलाखतीत आदर्श म्हणाला, “मला असं वाटतं अनेकजण चित्रपट न पाहता किंवा त्याविषयी नीट विचार न करताच फॅशन म्हणून शिव्या घालतात. जर चित्रपट पाहिला असेल आणि तरी तो आवडला नसेल तर आमचा वेळ वाया घालवला म्हणून आम्हाला खुशाल शिव्या द्या. परंतु कमीत कमी आधी तो पाहून तरी घ्या. आम्ही काय मेहनत केली आहे, ते तरी समजून घ्या. आमचा चित्रपट रिमेक असला तरी लेखकांनी अत्यंत समजुतदारपणे स्क्रीप्ट लिहिली आणि बदलली आहे. ज्या लोकांनी हा चित्रपट पाहिला, त्यांनी मला सांगितलं की हा अजिबात मूळ चित्रपटासारखा नाही. त्यामुळे प्रेक्षकांनी एक संधी द्यावी आणि हा चित्रपट पहावा, असं मला वाटतं. छोटी व्यावसायिक चित्रपटेसुद्धा प्रेक्षकांनी पहावीत.”
कोविडनंतर प्रेक्षकांच्या चित्रपटांबद्दलच्या निवडी बऱ्याच बदलल्याचंही मत आदर्शने यावेळी मांडलं. याविषयी तो पुढे म्हणाला, “लोकांनी मोठमोठ्या चित्रपटांसोबतच छोटी आणि कमी बजेटची चित्रपटेही पहावीत. जेणेकरून त्यातील कलाकारांना आणखी एक संधी मिळू शकेल. कोविडनंतर लोक फक्त मोठे, ॲक्शन चित्रपटच थिएटरमध्ये बघायला जात आहेत. त्यांनी ॲनिमल, बॉर्डर 2, धुरंधर यांसारखे चित्रपट पहावेत. परंतु त्याचसोबत यासारख्या छोट्या-मोठ्या चित्रपटांसाठीही प्रेक्षकांनी थिएटरमध्ये काही संख्येने तरी यावं. मी असं म्हणत नाही की अशा चित्रपटांनी खूप पैसा कमवावा, परंतु जर सतत मोठं नुकसान होत असेल तर, निर्माते नवीन कथांसोबत प्रयोग करणंच सोडून देतील. मग फक्त मोठ्या स्टार्सचे मोठेच चित्रपट पाहिले जातील. मग माझ्यासारखे कलाकार कुठे जातील? नवोदित कलाकार कुठे जातील?”
