Lara Dutta : तिनं प्रभू रामाला वनवासाला पाठवलं नसतं तर रामायण घडलंच नसतं…प्रसिद्ध अभिनेत्रीनं मांडली कैकयीची बाजू

Lara Dutta : प्रसिद्ध अभिनेत्री लारा दत्तानं कैकयीबद्दल तिचं मत व्यक्त केलं आहे.

Lara Dutta : तिनं प्रभू रामाला वनवासाला पाठवलं नसतं तर रामायण घडलंच नसतं...प्रसिद्ध अभिनेत्रीनं मांडली कैकयीची बाजू
| Updated on: Nov 17, 2026 | 9:35 PM

‘रामायण’च्या कथेत कैकेयीचा उल्लेख होताच, आपल्या डोळ्यासमोर एका सावत्र आईची प्रतिमा उभी राहते, जिनं आपला मुलगा भरतला राजा बनवण्यासाठी प्रभू रामाला १४ वर्षांसाठी वनवासात पाठवलं होतं. पण कैकेयी खरोखरच इतकी दुष्ट होती का? तिनं केवळ स्वतःच्या स्वार्थापोटी रामाला अयोध्येतून दूर पाठवलं होतं का? आता, बॉलिवूड अभिनेत्री लारा दत्तानं कैकेयीच्या व्यक्तिरेखेबद्दल आपलं मत मांडलं आहे.

कैकेयीबद्दल काय म्हणाली लारा दत्ता?

Loading...

नितेश तिवारी यांच्या ‘रामायण’ या चित्रपटात कैकेयीची भूमिका साकारणारी लारा दत्ता म्हणाली की, कैकेयीला नेहमीच नकारात्मक दृष्टिकोनातून चित्रित केलं गेलं आहे. कैकेयीचा निर्णय केवळ राग किंवा सत्तेच्या लालसेपोटी घेतलेला नव्हता, तर तो एका आईच्या प्रेमातून, आपल्या मुलाच्या हक्कांविषयीच्या चिंतेतून आणि राजा दशरथाला दिलेल्या एका जुन्या वचनातूनही आला होता. इतकंच नाही, तर लारानं असंही म्हटलं आहे की, जर कैकेयीनं रामाला वनवासाला पाठवलं नसतं, तर आज आपल्याला माहीत असलेलं रामायण कदाचित अस्तित्वातच आलं नसतं.

लारा दत्तानं ‘स्क्रीन’ला दिलेल्या मुलाखतीत कैकेयीच्या भूमिकेबद्दल भाष्य केलं. अभिनेत्रीनं सांगितलं की, कैकेयीनं एकदा रणांगणावर राजा दशरथाचा जीव वाचवला होता. यामुळे प्रसन्न होऊन, दशरथानं तिला दोन वरदान देण्याचं वचन दिलं. पण कथेत आणखी एक महत्त्वाचं वळण होतं. लग्नाआधीच राजा दशरथानं कैकेयीच्या वडिलांना एक वचन दिलं होतं. खरं तर, कैकेयीचे वडील तिचं लग्न दशरथाशी लावून देण्यास तयार नव्हते, कारण ती राजाची तिसरी राणी व्हावी असं त्यांना वाटत नव्हतं. पण, दशरथानं वचन दिलं की, कैकेयीचा मुलगा मोठा नसला तरी, तोच अयोध्येचा राजा होईल. याचा अर्थ असा की, कैकेयीचा विश्वास होता की, तिचा मुलगा भरतलाही तेच हक्क मिळावेत जे त्याच्या वडिलांना दिले होते. लारानं सांगितलं की, कैकेयीसमोर एकीकडे रामावरील प्रेम आणि दुसरीकडे आपल्या मुलाच्या हक्कांची जबाबदारी, असं आव्हान होतं.

 

लारा दत्ता पुढे म्हणाली की, कैकेयीची भूमिका साकारणं तिच्यासाठी खूप आव्हानात्मक होतं. ती म्हणाली की, कैकेयी एक अशी आई होती जी आपल्या मुलाच्या हक्कांसाठी उभी राहिली. तिला भीती होती की, जर तिनं आपल्या मुलासाठी आवाज उठवला नाही, तर अयोध्येसारख्या मोठ्या राज्याचं राजकारण आणि दरबारी कारस्थानांमध्ये भरत आपला हक्क गमावून बसेल. तिच्या निर्णयामागे अनेक कारणे होती.

सीतेचं अपहरण आणि रावणासोबतचं युद्ध यांसारख्या घटना राम वनवासात गेल्यानंतरच घडल्या. जर कैकेयीनं हा निर्णय घेतला नसता, तर रामायणाची कथा आज आपल्याला जशी माहीत आहे तशी कदाचित नसती, असंही अभिनेत्री म्हणाली.

Loading...
Unable to load recommendations.
Follow Us