Pathaan | ‘पठाण’च्या स्क्रिनिंगदरम्यान चाहत्याने थिएटरमध्येच उधळले पैसे; पहा व्हिडीओ

जयपूर: सध्या सोशल मीडियावर ‘पठाण’ याच चित्रपटाची जोरदार चर्चा आहे. 25 जानेवारी रोजी शाहरुख खानचा हा चित्रपट प्रदर्शित झाला आणि अवघ्या पाच दिवसांत त्याने जगभरात तब्बल 550 कोटी रुपयांची कमाई केली. पठाण हा चित्रपट बॉक्स ऑफिसवर नवनवे विक्रम रचत असतानाच सोशल मीडियावर थिएटरमधील काही व्हिडीओ व्हायरल होत आहेत. या व्हिडीओमध्ये चाहत्यांकडून शाहरुखवर प्रेमाचा वर्षाव होताना दिसतोय. सोशल मीडियावरील अशाच एका व्हिडीओने सर्वांचं लक्ष वेधलं आहे. कारण या व्हिडीओत शाहरुखचा एक चाहता थिएटरमध्ये चक्क नोटांचा वर्षाव करताना दिसत आहे.

हा व्हायरल व्हिडीओ जयपूरमधल्या एका थिएटरमधला असल्याचं कळतंय. तर व्हिडीओत पैशांची उधळण करणाऱ्या व्यक्तीचीही ओळख पटली आहे. अभिषेक पांडे असं त्या व्यक्तीचं नाव आहे. ‘पठाण’च्या शोदरम्यान जेव्हा शाहरुखचं ‘झुमे जो पठाण’ हे गाणं सुरू होतं, तेव्हा प्रेक्षक स्क्रीनजवळ जमा होऊन जल्लोषाने नाचतात. त्याचवेळी अभिषेक पांडे नावाची ही व्यक्ती नोटांचा वर्षाव करत असते.

पहा व्हिडीओ

शाहरुखने तब्बल चार वर्षांनंतर मोठ्या पडद्यावर कमबॅक केलं आहे. त्यामुळे प्रेक्षकांमध्ये त्याच्या या चित्रपटाची प्रचंड उत्सुकता होती. पठाण प्रदर्शित झाल्यापासून ‘मन्नत’ बंगल्याबाहेर शाहरुखची एक झलक पाहण्यासाठी चाहते तुंबड गर्दी करत आहेत. शाहरुखनेही बंगल्याच्या बाल्कनीत येऊन चाहत्यांच्या या शुभेच्छांचा स्वीकार केला.

शाहरुखने त्याच्या ट्विटर अकाऊंटवर याचा व्हिडीओ शेअर केला आहे. ‘पठाणच्या घरी पाहुणाचार.. या सर्व पाहुण्यांचे खूप खूप आभार’, असं कॅप्शन लिहित त्याने व्हिडीओ शेअर केला. शाहरुखची एक झलक पाहण्यासाठी एक चाहता उत्तराखंडहून मुंबईला आला होता.