Manasi Kulkarni: सासरचे म्हणतात दुसरं लग्न…; पुनर्विवाहाबद्दल मानसी कुलकर्णीचा महत्त्वाचा निर्णय
Manasi Kulkarni: अभिनेत्री मानसी कुलकर्णी नुकत्याच दिलेल्या एका मुलाखतीत तिच्या वैयक्तिक आयुष्याविषयी मोकळेपणे व्यक्त झाली. दुसऱ्या लग्नाबद्दल सासरच्या मंडळींचं काय मत आहे, याचाही खुलासा तिने केला.
मराठी अभिनेत्री मानसी कुलकर्णी सध्या तिच्या वैयक्तिक आयुष्यामुळे चर्चेत आहे. सिंगल पॅरेंट म्हणून ती तिच्या लेकीचा सांभाळ करत असून, नुकत्याच दिलेल्या एका मुलाखतीत तिने दुसऱ्या लग्नाबाबत मनमोकळेपणाने भाष्य केलं. विशेष म्हणजे, कुटुंबीय, मित्र-मैत्रिणी आणि नातेवाईकांसोबतच तिच्या सासरच्या मंडळींनीही तिला पुनर्विवाहाचा विचार करण्याचा सल्ला दिला आहे. मात्र, सध्या तरी दुसरं लग्न करण्याची आपली इच्छा नसल्याचं मानसीने स्पष्ट केलं आहे. मानसीने ‘इट्स मज्जा’ला दिलेल्या मुलाखतीत आपल्या वैयक्तिक आयुष्याविषयी अनेक गोष्टी शेअर केल्या. “तू अजूनही तरुण आहेस. त्यामुळे दुसऱ्या लग्नाचा विचार कर”, असं घरातील व्यक्ती आणि जवळचे मित्र म्हणत असल्याचं तिने सांगितलं.
सासरच्या मंडळींकडून इतका पाठिंबा मिळत असूनही मानसीने सध्या दुसरं लग्न करण्याचा निर्णय घेतलेला नाही. तिच्यासाठी हा निर्णय इतरांच्या अपेक्षांपेक्षा स्वतःच्या मनाशी संबंधित असल्याचं तिने म्हटलं आहे. दुसऱ्या लग्नाचा विचार का करत नाहीस, या प्रश्नावर मानसीने अत्यंत स्पष्ट उत्तर दिलं. तिने स्वतःवर कोणत्याही प्रकारच्या बंधनांचा डोंगर उभा केलेला नसल्याचं सांगितलं. मात्र, सध्या तिला पुनर्विवाहाची गरज वाटत नाही, असं तिने स्पष्ट केलं आहे. तिच्या आयुष्यात मुलीची जबाबदारी महत्त्वाची आहे. सिंगल पॅरेंट म्हणून मुलीचं संगोपन करताना येणाऱ्या आव्हानांबद्दलही ती बोलली.
मानसीने स्वतःला कायम खंबीर ठेवण्याचा प्रयत्न करत असल्याचं सांगितलं असलं, तरी ती देखील एक माणूस आहे आणि कधी कधी भावनिकदृष्ट्या कोलमडते, हे तिने मान्य केलं. शारीरिक फिटनेससाठी व्यायाम, योगा यांसारखे पर्याय आहेत; मात्र मानसिकदृष्ट्या मजबूत राहण्यासाठी स्वतःलाच सातत्याने मेहनत घ्यावी लागते, असं ती म्हणाली. वाईट काळात मनातील भावना कुणासोबत तरी शेअर करण्याची गरज भासते, असंही मानसीने सांगितलं. अशा वेळी ती वॉकला जाते किंवा काही काळ एकटी राहून स्वतःला शांत करण्याचा प्रयत्न करते. आपल्या भावनांचा आपल्या मुलीवर नकारात्मक परिणाम होऊ नये, याचीही ती काळजी घेते.
मानसीने आपल्या मुलीपासून भावना कायम लपवून ठेवण्याचा विचार नसल्याचंही सांगितलं. मुलगी मोठी झाल्यानंतर तिच्यासमोर मनातील गोष्टी नक्की व्यक्त करेन, असं अभिनेत्रीने म्हटलं. सध्या मात्र मुलीवर आपल्या भावनिक अवस्थेचा चुकीचा परिणाम होऊ नये, याकडे तिचं लक्ष आहे. आपल्या आयुष्यातील कठीण प्रसंगांमध्ये गुरु आणि बहिणीचा मोठा आधार मिळत असल्याचंही मानसीने सांगितलं. त्यामुळे दुसऱ्या लग्नाचा निर्णय घेण्याऐवजी सध्या ती मुलगी, स्वतःचं मानसिक स्वास्थ्य आणि आयुष्य पुढे नेण्यावर लक्ष केंद्रित करताना दिसत आहे.
