मराठी अभिनेत्रीचा CJP आंदोलनाला विरोध, थेट विरोधी पोस्ट करत म्हणाली…
सध्या देशात कॉकरोच जनता पार्टीच्या आंदोलनाची जोरदार चर्चा सुरु आहे. या आंदोलनात तरुणांसोबत अनेक विरोधी पक्ष नेते, कलाकार देखील सहभागी झाले आहेत. आता एका मराठमोळ्या अभिनेत्रीने सीजेपीच्या आंदोलना विरोधात पोस्ट शेअर केली आहे.
नीट पेपरफुटी प्रकरणावरून केंद्रीय शिक्षणमंत्री धर्मेंद्र प्रधान यांच्या राजीनाम्याच्या मागणीसाठी कॉकरोच जनता पार्टीने जंतर-मंतर येथे आंदोलन केले आहे. या आंदोलनात मोठ्या संख्येने तरुण सहभागी झाले असून विरोधी पक्षातील नेतेही उपस्थित आहेत. तसेच अनेक कलाकारांनी देखील सहभाग घेतल्याचे समोर आले आहे. या आंदोलनाकडे संपूर्ण देशाचे लक्ष लागले आहे. दरम्यान, एका मराठमोळ्या अभिनेत्रीने आंदोलनाविरोधात शेअर केलेली पोस्ट सर्वांचे लक्ष वेधून घेत आहे.
मराठी अभिनेत्री मेघा धाडेने घेतलेल्या आक्रमक भूमिकेची सध्या सर्वत्र चर्चेचा रंगली आहे. बिग बॉस मराठीच्या पहिल्या पर्वाची विजेती मेघा धाडेने तिच्या अधिकृत इन्स्टाग्राम अकाऊंटवर CJP आंदोलनाची तीव्र शब्दात निंदा केली आहे.
Megha Dhade
मेघा धाडे काय म्हणाली?
मेघा धाडेने अनेक व्हिडीओ आणि पोस्ट शेअर करत आंदोलकांवर टीका केली. एका व्हिडीओवर तिने कमेंट केली, “मी झुरळांऐवजी सिंहाला पाठिंबा देणारी आहे.” या व्हिडीओमध्ये पंतप्रधान नरेंद्र मोदी आणि भाजप नेत्यांचे फोटो होते. तिने शेअर केलेल्या एका पोस्टमध्ये लिहिले आहे की, “भाजपला विरोध करणे म्हणजे देशद्रोही नाही, पण देशद्रोह्यांना पाठिंबा देऊन भाजपला विरोध करणे हा खरा देशद्रोहीपण आहे.” दुसऱ्या एका पोस्टमध्ये तिने स्पष्ट म्हटले, “माझा पंतप्रधानांना पाठींबा आहे.” आंदोलकांनी दगडफेक केल्यामुळे पोलिसांना लाठीचार्ज करावा लागला, असा दावा करणारा व्हिडीओही तिने शेअर केला आहे.
मेघा धाडे कोण?
मेघा धाडे ही बिग बॉस मराठी सीझन १ ची विजेती आहे. तिने अनेक मराठी चित्रपट आणि मालिकांमध्ये काम केले आहे. नुकतेच तिने भारतीय जनता पक्षात औपचारिक प्रवेश केला. पक्षप्रवेशाच्या वेळी भाजप प्रदेशाध्यक्ष चंद्रशेखर बावनकुळे यांची उपस्थिती होती.
