आमिर खानशी लग्न करण्यासाठी कित्येक मुली उत्सुक, तो 3-4 मुलींचा..; सोनाली कुलकर्णीचं वक्तव्य चर्चेत

बॉलिवूडमध्ये अभिनेत्रींच्या वयाबरोबर त्यांच्या भूमिकाही बदलतात, असा मुद्दा अनेकदा चर्चेत येतो. विशेषतः अभिनेत्रींचं लग्न किंवा मातृत्व यानंतर त्यांना आई, पत्नी किंवा इतर वयस्कर व्यक्तिरेखा दिल्या जातात, अशी खंत व्यक्त केली जाते. याच मुद्द्यावर अभिनेत्री सोनाली कुलकर्णीने तिचं स्पष्ट मत मांडलं आहे. तिच्या मते, आता परिस्थितीत हळूहळू बदल होत असून अभिनेत्रींचं लग्न झालं किंवा त्यांना मुलं झाली म्हणून त्यांचं करिअर थांबण्याची गरज नाही. याच संदर्भात तिने आमिर खान आणि सैफ अली खान यांचं उदाहरण देत त्यांच्या बदललेल्या भूमिकांचं कौतुक केलं आहे.

सोनाली कुलकर्णीने अभिनेत्रींचं लवकर ‘टाइपकास्ट’ होण्याबाबत प्रश्न विचारण्यात आला होता. यावेळी तिने तिच्या अनुभवाचाही दाखला दिला. 2019 मध्ये प्रदर्शित झालेल्या ‘भारत’ चित्रपटात तिने सलमान खानच्या आईची भूमिका साकारली होती. विशेष म्हणजे सोनाली सलमानपेक्षा तब्बल नऊ वर्षांनी लहान आहे. या भूमिकेबद्दल तिने यापूर्वीही भाष्य केलं होतं. तिच्या मते, एखाद्या कलाकाराला भूमिका आवडत असेल आणि काम करण्याची संधी मिळत असेल, तर अशा संधींकडे वेगळ्या दृष्टिकोनातून पाहायला हवं.

‘लग्न झालं म्हणजे अभिनेत्रीचं करिअर संपत नाही’

सोनालीच्या मते, अभिनेत्रींच्या वैयक्तिक आयुष्याचा त्यांच्या कामावर परिणाम व्हायला नको. नायिकांचंही लग्न होतं, त्यांना मुलं होतात, कुटुंब असतं आणि तरीही त्या चांगलं काम करू शकतात, हा विचार मनोरंजनसृष्टीत अधिक स्वीकारला जाण्याची गरज आहे. अभिनेत्रीच्या आयुष्यात लग्न किंवा मातृत्व आलं म्हणून तिला केवळ आईच्या भूमिका देणं योग्य नाही, असा तिच्या बोलण्याचा सूर होता.

“आपल्याकडे अनेक अष्टपैलू अभिनेते आहेत. मला नाही वाटत की कोणताही अभिनेता म्हणेल की त्याला तरुण दिसायचं आहे. जर आपण सैफ अली खानबद्दल बोललो तर तो दिवसेंदिवस अधिकाधिक मॅच्युअर होत आहे. तो प्रेमात पडलेल्या तरुण वडिलांची भूमिका साकारायला घाबरत नाही. आमिर खान म्हणजे प्रयोग करण्याचं मूर्तिमंत उदाहरण आहे. मला नाही वाटत ती ‘दंगल’मध्ये त्याने जे केलं, ते करण्याची हिंमत इतर कोणामध्ये असेल. आमिर खान, ज्याचे पोस्टर सगळीकडे लागतात, मुली त्याच्यासाठी वेड्या होतात, त्याच्याशी लग्न करण्यासाठी जीव देतात. तो कोणत्याही प्रोस्थेटिक्सशिवाय स्वत:ला तीन-चार मुलींचा बाप म्हणून सादर करतो, तर तो माझा हिरो आहे. तो निर्भयपणे स्वत:ला झोकून देत आहे. मला नाही वाटत की कोणताही चांगला अभिनेता तरुण दिसण्याच्या स्पर्धेत अडकला आहे. ते त्यांची प्रतिभा दाखवत आहेत. त्यांना त्यांच्या वयाची भीती वाटत नाही,” असं मत सोनालीने मांडलं आहे.