26 वर्षांनी मोठ्या दिग्दर्शकासोबत लग्न, वयाच्या 17व्या वर्षी मृत्यू; अभिनेत्रीच्या मृत्यूचं गूढ कायम, इंदिरा गांधींना लिहिण्यात आलेलं पत्र

दाक्षिणात्य चित्रपटांपासून ते बॉलिवूडपर्यंतच्या अनेक नायिकांचा मृत्यू आणि आत्महत्यांभोवती प्रश्नचिन्हे निर्माण झाली आहेत. 2018 मध्ये श्रीदेवी यांचं निधन झालं. बाथटबमध्ये बुडून त्यांचा मृत्यू झाला.तरीही, आजही काही अभिनेत्रींच्या मृत्यूकडे संशयाच्या नजरेनं पाहिलं जातं. असेच प्रश्न 46 वर्षांपूर्वी उपस्थित झाले होते, जेव्हा एका 17 वर्षीय सुपरस्टार अभिनेत्रीनं आत्महत्या केली होती. तिची कारकीर्द उत्तम होती आणि तिनं दिव्या भारतीसारखंच स्टारडम मिळवलं होतं, पण वयाच्या 17 व्या वर्षी तिचा मृत्यू झाला. या अभिनेत्रीचं नाव शोभा होतं. शोभा आत्महत्या करू शकते, यावर कोणाचाही विश्वास बसला नाही. अभिनेत्रीच्या आईनं तिचा जावई, शोभाचा पती, बालू महेंद्र याच्यावर आपल्या मुलीच्या हत्येचा आरोप केला. बालू महेंद्र हे एक प्रसिद्ध चित्रपट दिग्दर्शक होते, ज्यांनी श्रीदेवी आणि कमल हासन अभिनीत ‘सदमा’सह अनेक चित्रपटांचं दिग्दर्शन केलं होतं. वयाच्या 17 व्या वर्षी शोभानं दिव्या भारतीसारखंच स्टारडम मिळवलं होतं. राष्ट्रीय पुरस्काराव्यतिरिक्त तिनं इतरही अनेक पुरस्कार जिंकले होते. तिच्याकडे चित्रपटांची रांग लागलेली होती. अभिनेत्रीकडे संपत्ती, प्रसिद्धी आणि नाव होतं. पण हे सर्व काही क्षणांतच नाहीसं झालं.

शोभानं स्वतःच्या मर्जीनं लग्न केलं. तिच्या कुटुंबाचा या लग्नाला विरोध असूनही, ती बालू महेंद्रच्या प्रेमात पडली आणि त्याच्यासोबत राहायला लागली. शोभाच्या आयुष्यात सर्व काही इतकं चांगलं चाललं असताना, तिनं आत्महत्या का केली असेल? 46 वर्षांनंतरही ही आत्महत्या होती की हत्या, हे एक रहस्यच आहे.

शोभाचं खरं नाव महालक्ष्मी मेनन होतं, पण चित्रपटांमध्ये आल्यानंतर ती शोभा नावाने प्रसिद्ध झाली. तिनं वयाच्या पाचव्या वर्षी चित्रपटसृष्टीत प्रवेश केला. बालकलाकार म्हणून शोभानं आपल्या कारकिर्दीची सुरुवात मल्याळम चित्रपटांमधून केली. तिचा पहिला चित्रपट, ‘उद्योगस्थ’, सुपरहिट ठरला. यानंतर, शोभानं बालकलाकार म्हणून अनेक चित्रपटांमध्ये काम केलं आणि 60 च्या दशकातील एक अव्वल स्टार बनली. इतक्या लहान वयात शोभाची प्रतिभा पाहून चित्रपट निर्माते थक्क झाले आणि तिला मुख्य भूमिका देऊ लागले. वयाच्या 17 व्या वर्षापर्यंत शोभानं जवळपास ३० चित्रपटांमध्ये काम केलं होतं आणि असंख्य पुरस्कार जिंकले होते. तिला एक राष्ट्रीय पुरस्कारही मिळाला होता. अगदी कमी वेळात, ती मल्याळम चित्रपटसृष्टीतील आघाडीच्या आणि सर्वाधिक मानधन घेणाऱ्या अभिनेत्रींपैकी एक बनली.

काय घडलेलं नेमकं?

आपल्या मुलीची प्रसिद्धी आणि संपत्ती पाहून तिच्या आईनं शोभासाठी येणारे लग्नाचे प्रस्ताव नाकारायला सुरुवात केली. दरम्यान, शोभा दिग्दर्शक बालू महेंद्रला भेटली आणि त्याच्या प्रेमात पडली. तिच्या कुटुंबानं त्यांच्या नात्याला विरोध केला, पण शोभानं त्यांच्या इच्छेविरुद्ध जाऊन त्याच्याशी लग्न केलं. बालू महेंद्र शोभापेक्षा जवळपास 26 वर्षांनी मोठा होता आणि त्याला एक मूलही होतं. शोभाच्या कुटुंबाचा या लग्नाला विरोध होता. शोभानं त्याच्याशी लग्न करण्याचा आग्रह धरला आणि घर सोडलं. पण, तिचे तिच्या कुटुंबासोबतचे संघर्ष आणि वाद कमी झाले नाहीत. बालू महेंद्र नंतर अचानक आपल्या पहिल्या पत्नी आणि मुलाकडे परत आला, ज्यामुळे शोभा दुःखी झाली. त्यांचं वैवाहिक जीवन हादरलं. बालू महेंद्रनं शोभाला सोडून आपली पहिली पत्नी आणि मुलासोबत राहण्याचा निर्णय घेतला होता. शोभाला मोठा धक्का बसला होता. ज्या माणसासाठी तिनं आपलं घर, आयुष्य आणि करिअर धोक्यात घातलं होतं, तो आता तिला सोडून जात होता. पण अशा परिस्थितीतही, शोभाचं कुटुंब तिला परत आणायला तयार होतं. ते घरी पोहोचलेसुद्धा, पण शोभानं दार उघडलं नाही. तो 1 मे 1980 चा दिवस होता.

खूप प्रयत्नांनंतर, जेव्हा दरवाजा तोडण्यात आला, तेव्हा शोभाचा मृतदेह छताच्या पंख्याला लटकलेल्या अवस्थेत आढळला. शोभाचा मृत्यू हा संपूर्ण दक्षिण भारतीय चित्रपटसृष्टी आणि तिच्या चाहत्यांसाठी एक मोठा धक्का होता. हजारो चाहते तिच्या अंत्यविधीसाठी जमले होते, त्यांच्या डोळ्यात अश्रू दाटून आले होते. शोभाची आई शांत राहिली. तिनं शोभाच्या पतीवर हत्येचा आरोप केला. इतकंच नाही तर, तिनं तत्कालीन पंतप्रधान इंदिरा गांधी यांना चौकशीची मागणी करणारं पत्रही लिहिलं. शोभाच्या मृत्यूप्रकरणी बालू महेंद्र यांना अनेक आरोप आणि वादांना सामोरं जावं लागलं, परंतु तिच्या मृत्यूमागील गूढ अजूनही उलगडलेलं नाही.