‘मन उडु उडु झालं’ (Man Udu Udu Zhala) या मालिकेने प्रेक्षकांना टीव्ही स्क्रीनवर खिळवून ठेवलं आहे. दिपू (Hruta Durgule) आणि इंद्राची (Ajinkya Raut) जोडी आणि त्यांची प्रेमकहाणी प्रेक्षकांच्या भलतीच पसंतीस पडतेय. कथेत जर खलनायक असेल तर त्याची रंजकता अजूनच वाढते. या मालिकेच्या कथानकात सध्या सानिका आणि कार्तिक हे नकारात्मक भूमिकेत दिसत आहेत. सानिका आपल्या फायद्यासाठी गरोदर असल्याचं नाटक करते पण तिचं हेच खोटं आता सगळ्यांसमोर येणार आहे. मालिकेत प्रेक्षकांनी पाहिलं की देशपांडे सरांच्या घरी असलेल्या पूजेला सानिका आणि कार्तिक येतात आणि सानिका पपई खाते. त्यामुळे तिला डॉक्टरकडे घेऊन जायची लगबग सुरु होतो.
सानिका डॉक्टरकडे जाण्यासाठी नकार देत असते पण तिचं न ऐकता दिपू तिला डॉक्टरकडे घेऊन जाते. डॉक्टरकडे गेल्यावर दिपूला कळतं की सानिका गरोदर नाही. पण ती घरी ही गोष्ट सांगत नाही. सानिकाची चोर ओटी भरत असताना तिला काही मोठं गिफ्ट माहेरून मिळालं नाही म्हणून ती तमाशा करते. तिचा तमाशा खूप वेळ सहन केल्यावर दिपू सगळ्यांना खरं काय आहे ते सांगते. सानिकाचा खोटारडेपणा आल्यावर तिच्या घरच्यांची काय प्रतिक्रिया असेल, हे प्रेक्षकांना लवकरच मालिकेत पाहायला मिळेल.
दुसरीकडे सानिकामुळे दिपूचा अपघात होणार असल्याचं मालिकेच्या प्रोमोमध्ये दाखवण्यात आलं आहे. सानिकाला दिपू समजवायला जाते, मात्र दिपूलाच ती हात धरून घराबाहेर काढते. दिपूला धक्का दिल्यामुळे रस्त्यावरील एका गाडीची धडक तिला लागते आणि ती जमिनीवर कोसळते. या नव्या प्रोमोच्या कमेंट्समध्ये प्रेक्षकांनी सानिकावर राग व्यक्त केला आहे.