TMKOC : महिनाभराच्या भूताच्या ट्रॅकचा फज्जा? चोर निघालं मांजर, ‘तारक मेहता’ ट्रोल

‘तारक मेहता का उल्टा चश्मा’ ही मालिका प्रेक्षकांना खूप आवडते. या शोमध्ये जेव्हा भुताचा सीक्वेन्स येतो, तेव्हा शोचा टीआरपी जबरदस्त वाढतो. गेल्या काहि दिवसांपासून शोमध्ये भूताशी निगडीत ट्रॅक दाखवण्यात येत आहे. ते भूत कोण असेल किंवा भूत बनून गोकुळधाम सोसायटीच्या रहिवशांना कोणा घाबरवतंय, हे जाणून घेण्यास चाहते खूपच उत्सुक होते. मात्र या मागे नेमकं कोण आहे, ते समोर आल्यावर चाहत्यांची चांगलीच निराशा झाली आहे. शोचा हा ट्रॅक टक्क ट्रोल होतोय. चला याबद्दल जाणून घेऊया.

पुतळ्याने केली चोरी, सोसायटीमध्ये हंगामा

तारक मेहता शोमध्ये दाखवण्यात आलं होतं की, पोपटलाल हा एक दुल्हनचा, नववधूचा पुतळा घेऊन येतो. मात्र तो पुतळा सोसायटीत येताच चोरी व्हायला सुरूवात होते. त्यानंतर तपासासाठी पोलिसांना पाचारण करण्यात येतं. पोलिसांनी तपास केल्यावर चोरीचं सगळं सामान पोपटला याच्या घरातून मिळतं. सगळं सामान त्या पुतळ्याजवळ असतं. अखेर पोलीस पोपटलालला अटक करतात. पण चोरी पुतळ्याने केली आहे असं पोपटलाल सोसायटीमधल्य लोकांना सांगतो. तेव्हा पुतळा विचित्र हरकती करायला लागतो, आणि त्याच्या चेहऱ्यावर असलेला घुंगट, आपोआपा बाजूला होतो.

भूत नव्हे मांजरच चोर ?

सोसायटीमध्ये होत असलेल्या चोऱ्यांमागे नेमकं कोण आहे, याचा शोध घेत असताना संपूर्ण गोकुळधाम सोसायटीला त्या पुतळ्यात भूत असल्याचा संशय येतो. मात्र आता या प्रकरणात एक वेगळेच सत्य समोर आलं.सोसायटीमध्ये ज्या चोऱ्या झाल्या त्या कोणत्याही भुताने नव्हे तर मांजरीने केल्याचं समोर आलं. खरंतर सोसायटीतील लोकांना सुरुवातीपासूनच पुतळ्याबद्दल संशय वाटत असतो. त्या पुतळ्यात भूत असून तेच सोसायटीमध्ये चोरी करत असल्याचं सर्वांना वाटू लागतं.  एके रात्री तर भूताच्या नावाने सोसायटीमध्ये चांगलाच गोंधळ उडतो.  अखेर सोसायटीतील लोक देवाच्या चरणी जातात आणि या संकटातून आपली सुटका व्हावी, अशी प्रार्थना करतात. याच दरम्यान रत्नाची मुले एक महत्त्वाची माहिती देतात. त्यांनी सोसायटीमध्ये लावलेल्या कॅमेऱ्यात चोरीची संपूर्ण घटना रेकॉर्ड झाल्याचं ते सांगतात. त्यानंतर सर्वजण मिळून सीसीटीव्ही फुटेज तपासतात. रेकॉर्डिंग पाहिल्यानंतर त्यातून जे सत्य समोर येतं, त्याने सर्वांनाच मोठा धक्का बसतो.

चोरी करणारं कोणी भूत नव्हे तर ते एक मांजर असतं. कॅमेऱ्याच्या रेकॉर्डिंगमधून स्पष्ट होते. विशेष म्हणजे, या मांजरीला चोरी करण्याचे प्रशिक्षण देण्यात आलेलं असतं. सोनं दिसलं रे दिसलं की ते उचलून नेण्याची तिला सवय लावण्यात आलेली असते. त्यामुळे सोसायटीमध्ये झालेल्या चोरीच्या घटनांमध्ये या मांजरीचा मोठा हात असल्याचं समोर येतं. यानंतर संपूर्ण सोसायटी त्या मांजरीला पकडण्यासाठी धावपळ करू लागते. मात्र मांजर काही सहज त्यांच्या हाती लागत नाही. अखेर तिला दूध दाखवून तिचा विश्वास संपादन केला जातो आणि मोठ्या प्रयत्नांनंतर मांजरीला पकडण्यात यश मिळतं.

चोराचा खुलासा झाल्याने चाहते नाराज

चोर म्हणून मांजरीचा खुलासा झाल्यानंतर मात्र मालिकेच्या चाहत्यांमध्ये नाराजी पाहायला मिळत आहे. अनेक प्रेक्षकांनी सोशल मीडियावर आपली निराशा व्यक्त केली आहे. “ तारक मेहता मालिकेत मांजराने चोरी केली. मी गेल्या महिन्यापासून भूत-प्रेताचा ट्रॅक पाहत होते. मला वाटलं होतं की, काहीतरी चांगलं पाहायला मिळेल. पण एवढा मोठा ट्रॅक दाखवल्यानंतर शेवटी चोर म्हणून मांजराला दाखवले. जुने कलाकार आणि जुने कॅरेक्टर किती चांगले होते. आधी अनेक कलाकार मालिकेतून गेले आणि आता त्यातही एवढे कंटाळवाणे ट्रॅक दाखवले जात आहेत. आता मला हा शो बघायचाच नाही,” असं लिहीत एका युजरने निराशा व्यक्त केली. तसेच दुसऱ्या एका चाहत्यानेही आपली नाराजी व्यक्त केली. त्याने म्हटले, ‘ आम्हाला आजपर्यंत एवढं वाईट कधीच वाटलं नव्हतं .आपण हा शो पाहणं बंद करण्याचा निर्णय घेतला आहे,’  असं त्याने सांगितलं. एकंदरच या ट्रॅकवर बरीच टीका केली जात आहे.