Nepal Flash Floods : नेपाळच्या महापुरात अखेर मोठा चमत्कार! पुरात बुडालेल्या घरात ती जिवंत सापडली, 11 दिवसांपासून महिला लढत होती
या माहपुरात अनेक लोकांचा मृत्यू झालाय. पण तरीही एखादी व्यक्ती जिवंत असेल या आशेपोटी तेथे सर्च ऑपरेशन सुरू करण्यात आले आहे. या ऑपरेशनमध्ये संबंधित महिला जिवंत असल्याचे समोर आल्याने समाधान व्यक्त केले जात आहे.
Nepal Flash Floods : नेपाळमध्ये काही दिवसांपूर्वी आलेल्या महापुरामुळे सगळं उद्ध्वस्त झालं. अनेक लोकांचे संसार पाण्याखाली, चिखलाखाली दबून गेले. काही ठिकाणी तर पूर्ण कुटुंबंच पाण्यामुळे मृत्युमुखी पडले. या महाकाय संकटामध्ये आतापर्यंत 1000 पेक्षा जास्त लोकांचा मृत्यू झाल्याचे समोर आले आहे. अजूनही शेकडो लोक गायब आहेत. त्यांचा शोध घेतला जात आहे. रेस्कूय टीमकडून प्रत्येक घरात शोधमोहीम राबवली जातेय. सापडलेले मृतदेह बाहेर काढून त्यांच्यावर अंत्यसंस्कार केले जात आहेत. या महाप्रलयात अडकलेले लोक जिवंत असण्याची शक्यता तशी कमीच आहे. परंतु आता एक खूप मोठा चमत्कार घडला आहे. एक महिला तब्बल 11 दिवस अन्न-पाण्याविना होती. तरीदेखील या महापुरात तिचा जीव वाचला असून तिला रेस्क्यू टीमने तिला बाहेर काढलं आहे.
नेमकं काय घडलं?
समोर आलेल्या माहितीनुसार नेपाळच्या महापुरात बचावलेल्या महिलेचे वय 60 वर्षे आहे. नेपाळमधील नुवाकोट जिल्ह्यातील बेत्रावतीमधील ही घटना असून ती महिला साधारण 11 दिवसांपासून एका घरात बसून होती. 11 दिवस ती कोणीतरी मदतीला धावून येईल, याची वाट पाहात होती. ती महिला ज्या घरात थांबलेली होती, ते घर महापुरात पाण्याखाली गेले होते. नंतर चिखलामुळे ते घर बुजून गेले होते.
महिला जिवंत असलेली दिसली, नंतर…
चिखलात बुजलेल्या घरात ती महिला जिवंत बसलेली होती. कोणीतरी मदतीला येईल या अपेक्षेने तिचे डोळे बंद असलेल्या दरवाजाकडे होते. दरम्यान, 26 ऑगस्टच्या नैसर्गिक आपत्तीनंतर सध्या नेपाळमध्ये मोठ्या प्रमाणात रेस्क्यू ऑपरेशन राबवले जात आहे. बचावपथकातील जवानांनी दरवाजा खोलताच समोर जिवंत महिला दिसली. तिला नंतर पिण्यासाठी पाणी देण्यात आले. सध्या तिला बाहेर काढण्यात आले आहे. तिच्यावर उपचार सुरू आहेत.
दरम्यान, या माहपुरात अनेक लोकांचा मृत्यू झालाय. पण तरीही एखादी व्यक्ती जिवंत असेल या आशेपोटी तेथे सर्च ऑपरेशन सुरू करण्यात आले आहे. या ऑपरेशनमध्ये संबंधित महिला जिवंत असल्याचे समोर आल्याने समाधान व्यक्त केले जात आहे. अजूनही तेथे रेस्क्यू ऑपरेशन सुरूच आहे.
