पाकिस्तानची गाढवं चीनला का आवडतात? अख्ख्या जगाला पडला प्रश्न; खरं कारण आलं समोर
Why China Imports Donkeys from Pakistan: चीन हा पाकिस्तानकडून मोठ्या प्रमाणात गाढवं खरेदी करत आहे. 2024 मधील करारानुसार पाकिस्तान चीनला 2 लाख गाढवं विकणार आहे. मात्र चीन पाकिस्तानकडून गाढवे खरेदी करुन त्यांचं नेमकं काय करतो? आज आपण याबाबत सविस्तर माहिती जाणून घेणार आहोत.
चीन हा पाकिस्तानकडून मोठ्या प्रमाणात गाढवे खरेदी करत आहे. 2024 मधील करारानुसार पाकिस्तान चीनला 2 लाख गाढवे विकणार आहे. पाकिस्तानच्या राष्ट्रीय अन्न सुरक्षा आणि संशोधन मंत्रालयाकडून याबाबत माहिती देण्यात आली आहे. तसेच आगामी काळात चीन पाकिसाकडून गाढवांची आयात आणखी वाढवणार असल्याची माहितीही समोर आली आहे. मात्र चीन पाकिस्तानकडून गाढवे खरेदी करुन त्यांचं नेमकं काय करतो? असा प्रश्न तुम्हाला पडला असेल. आज आपण याबाबत सविस्तर माहिती जाणून घेणार आहोत.
समोर आलेल्या माहितीनुसार चीनला गाढवे निर्यात करण्यासाठी पाकिस्तान कराची बंदराजवळ कत्तलखाना उघडण्याच्या तयारीत आहे. तसेच ग्वादरमध्ये नवीन कत्तलखाने बांधले जात आहेत. पाकिस्तानमध्ये सध्या ५.२ दशलक्ष गाढवे आहेत. पाकिस्तान सर्वाधिक गाढवे असणाऱ्या देशांच्या यादीत तिसऱ्या स्थानावर आहे. त्यामुळे पाकिस्तान चीनला मोठ्या प्रमाणात गाढवांची निर्यात करत असतो.
चीन पाकिस्तानकडून गाढवं का खरेदी करतो?
मिळालेल्या माहितीनुसार, चीनमध्ये एजियाओ नावाचे औषध बनवण्यासाठी गाढवांच्या कातडीपासून काढलेल्या जिलेटिनचा वापर केला जातो. चीन आणि इतर देशांमध्ये या औषधाची मागणी जास्त आहे. या औषधाचे उत्पादन वाढवण्यासाठी चीन पाकिस्तानमधून गाढवांची आयात करतो. एजियाओ नावाचे औषध तयार करण्यासाठी गाढवाच्या कातडीपासून काढलेल्या जिलेटिनमध्ये विविध औषधी वनस्पती आणि इतर घटक मिसळले जातात.
एजियाओ हे औषध रक्ताभिसरण सुधारते, रक्तस्त्राव थांबवण्यास मदत करते, त्वचा तजेलदार बनते, तसेच या औषधामुळे शांत झोप लागते. यासोबतच इतर अनेक आजारांसाठी देखील याचा वापर केला जातो. त्यामुळे बाजारात या औषधाची मोठी मागणी आहे. चीनमध्ये गाढवांचा जन्मदर घटना आहे, त्यामुळेच चीन पाकिस्तानकडून गाढवे खरेदी करत आहे.
चीनला दरवर्षी किती गाढवं लागतात?
टाईम्स ऑफ इंडियामधील एका वृत्तानुसार एजियाओ औषधासाठी दरवर्षी 60 लाख गाढवांच्या कातडी लागते. तसेच औषधांशिवाय गाढवांचे मांसही लोकप्रिय आहे. हेबेई प्रांतात, गाढवाच्या मांसापासून बनवलेला एक पदार्थ खूप लोकप्रिय आहे. तसेच चीनमध्ये गाढवाच्या मांसाचे बर्गर आवडीने खाल्ले जाते, ते बाओडिंग आणि हेजियान शहरांमध्ये लोकप्रिय आहेत.
दरम्यान, चीनमधील गाढवांची संख्या कमी झाल्याने ते आता पाकिस्तानकडून गाढवे खरेदी करत आहेत. पाकिस्तानमध्ये गाढवांची संख्या जास्त आहे, त्यामुळे दोन्ही देशांमधील व्यापार वाढला आहे. चीन पाकिस्तानला कर्ज देऊन त्यांना मदत करत आहे. 2022 मध्ये चीनचे पाकिस्तानवर 26.6 अब्ज डॉलर्सचे कर्ज असल्याची माहिती समोर आली होती.
