पाकिस्तान

14 ऑगस्ट 1947 रोजी झालेल्या फाळणीनंतर पाकिस्तान एक स्वतंत्र देश बनला. मोहम्मद अली जिन्ना यांना पाकिस्तानचे जनक मानले जाते. जिन्ना पाकिस्तानचे पहिले गव्हर्नर जनरल बनले आणि लियाकत अली खान यांची पंतप्रधान म्हणून नियुक्ती झाली. पाकिस्तानची राजधानी इस्लामाबाद आहे. पाकिस्तानमधील प्रमुख शहरांमध्ये लाहोर आणि कराचीचा समावेश होतो. ही शहरे ऐतिहासिक दृष्टिकोनातून जगभर प्रसिद्ध आहेत. पाकिस्तान हा जगातील 33वा सर्वात मोठा देश आहे आणि दक्षिण आशियामधील दुसऱ्या क्रमांकाचा सर्वात मोठा देश आहे. पाकिस्तानचं क्षेत्रफळ 881,913 चौरस किलोमीटर आहे. 2023 सालाच्या आकडेवारीनुसार पाकिस्तानची लोकसंख्या 241.5 दशलक्ष आहे. पाकिस्तान जगातील सर्वात मोठ्या मुस्लिम लोकसंख्येचा देश मानला जातो. 2017 च्या जनगणनेनुसार पाकिस्तानची लोकसंख्या 20.7 कोटी होती. पाकिस्तानात 48 टक्के पंजाबी आहेत आणि दुसऱ्या क्रमांकावर सुमारे 16 टक्के पठाण आहेत. पंजाबी लोकसंख्या मोठी असतानाही पाकिस्तानात पंजाबी भाषेला संवैधानिक दर्जा मिळालेला नाही. पाकिस्तान धर्माच्या आधारावर भारतापासून विभक्त झाला होता, पण बंगाली भाषा आणि अस्मितेच्या चळवळीमुळे 1971 साली पाकिस्तानपासून विभाजित होऊन बांगलादेशची निर्मिती झाली. पाकिस्तानची अर्थव्यवस्था प्रामुख्याने शेतीवर आधारित आहे. येथील प्रमुख धर्म इस्लाम आहे. पाकिस्तानची 96 टक्के जनता मुस्लिम आहे, तर 1.6 टक्के हिंदू आहेत. पाकिस्तानमध्ये चार प्रमुख प्रांत आहेत - पंजाब, सिंध, बलुचिस्तान आणि खैबर पख्तूनख्वा. पाकिस्तानने अनेक वेळा मार्शल लॉ, महागाई, खालावलेली अर्थव्यवस्था, दहशतवाद आणि राजकीय अस्थिरता यांचा सामना केला आहे. अमेरिका व्यतिरिक्त चीन हा पाकिस्तानचा सर्वात मोठा सहायक देश मानला जातो.