खासदार संजय सिंहांवर शाईफेक, याच शाईने इतिहास लिहू, ‘आप’चा योगींवर हल्लाबोल
आम आदमी पक्षाचे (आप) खासदार संजय सिंह हाथरसच्या कुटुंबीयांना भेटायला गेले असता त्यांच्यावर शाई फेकण्याचा प्रकार घडला.
नवी दिल्ली : आम आदमी पक्षाचे (आप) खासदार संजय सिंह हाथरसच्या कुटुंबीयांना भेटायला गेले असता त्यांच्यावर शाई फेकण्याचा प्रकार घडला. घडलेल्या प्रकारामुळे आम आदमी पक्ष आक्रमक झाला असून योगी सरकारवर हल्लाबोल करत याच शाईने आम्ही इतिहास लिहून दाखवू, असा इशारा आम आदमी पक्षाचे आमदार राघव चढ्ढा यांनी दिला आहे.
पीडितेच्या कुटुंबाचे सांत्वन करण्यासाठी वेगवेगळ्या पक्षाचे लोक हाथरसमध्ये जात आहेत. आप खासदार संजय सिंह देखील पीडितेच्या कुटुंबीयांना भेटायला गेले होते. त्यावेळी कुटुंबीयांना भेटून बाहेर आल्यानंतर त्यांच्यावर अचानक शाई फेकण्यात आली.
“संजय सिंह यांच्यावर शाई फेकून योगी सरकारने भ्याडपणाचा पुरावा दाखवला आहे. परंतु त्यांनी एक गोष्ट लक्षात ठेवावी याच फेकलेल्या शाईने आम्ही इतिहास लिहून दाखवू”, असं म्हणत आपचे दिल्लीचे आमदार राघव चढ्ढा यांनी योगी सरकारला इशारा दिला.
संजय सिंह यांच्यावर शाई फेकण्याचा प्रकार
हाथरस बलात्कार प्रकरणामुळे संपूर्ण देशात सध्या असंतोष आहे. देशभरात उत्तर प्रदेश सरकारविरोधात निदर्शनं केली जात आहेत. देशातील विविध पक्ष पीडितेच्या कुटुंबियांना भेट देत त्यांचे सांत्वन करत आहेत. आम आदमी पक्षाचे खासदार संजय सिंह हे सुद्धा त्यांना भेटायला गेले असता त्यांच्यावर शाई फेकण्याचा प्रकार घडला. हा सगळा प्रकार अचानक घडल्यामुळे सगळीकडे गोंधळ उडाला. शाई फेकणाऱ्याला पोलिसांनी अटक केली असून त्याची चौकशी सुरु आहे.
घडलेल्या प्रकारानंतर परिसरात काही काळासाठी तणावाचे वातावरण होते. आम आदमी पक्षाच्या कार्यकर्त्यांनी पोलीस प्रशासन आणि उत्तर प्रदेश सराकारविरोधात जोरदार घोषणाबाजी केली. आप पक्षाच्या उत्तर प्रदेश विभागाने, हा दिवस योगी आदित्यनाथ यांच्या शासनकाळातील काळा दिवस म्हणून नोंदवला जाईल, असे म्हणत निषेध व्यक्त केला.
प्रदेश सरकारकडून सामान्यांचे दमन होतंय : आम आदमी पक्ष
तसेच उत्तर प्रदेश सरकारकडून सामान्यांचे दमन केले जात असल्याचा आरोपही आप पक्षाने केला. हाथरस पीडितेच्या कुटुंबियांना भेटायला गेले असता पोलिसांडून अडवले जात असून मारले जात आहे, असेही आप पक्षाचे कार्यकर्ते म्हणाले. योगी आदित्यनाथ यांचे उत्तर प्रदेश सरकार दोषींना वाचवू पाहत असल्याचा आरोपही आप पक्षाने केला आहे.
राहुल गांधी-प्रियांका गांधींना धक्काबुक्की
दरम्यान, काँग्रेस पक्षाचे माजी अध्यक्ष राहुल गांधी आणि सरचिटणीस प्रियंका गांधी यांनी हाथरस बलात्कार पीडितेच्या कुटुंबियांना भेट दिली. यावेळी उत्तर प्रदेश पोलिसांनी राहुल गांधी यांना धक्कबुक्की केल्याचा आरोप करण्यात आला होता.
संबंधित बातम्या
Hathras case | पीडितेच्या कुटुंबियांना भेटायला गेले असता, संजय सिंह यांच्यावर फेकली शाई
Hathras Gang Rape | उत्तर प्रदेशात राष्ट्रपती राजवट लागू करा; मायावतींची मागणी
Rahul Gandhi | उत्तर प्रदेश पोलिसांकडून राहुल गांधींना धक्काबुक्की, कॉलर पकडून ताब्यात घेतलं