बीड: पंकजा मुंडे संपल्या आता त्या काही परत राजकारणात उभ्या राहत नाहीत, असं काही लोकांना वाटत होतं. काही लोकांनी तर मला अभिमन्यू करून चक्रव्यूहात अडकवण्याचा प्रयत्न केला. पण हे चक्रव्यूह कसं भेदायचं हे मला माहीत आहे, असा घणाघात भाजपच्या नेत्या पंकजा मुंडे यांनी केला. (pankaja munde on her political career)
भगवान गडावरून कार्यकर्त्यांशी संवाद साधताना पंकजा मुंडे यांनी आक्रमक आणि तडाखेबंद भाषण केलं. मला अभिमन्यू करण्याचा काही लोकांचा प्रयत्न होता. चक्रव्यूहात अडकवण्याचा त्यांचा डाव होता. पण हे चक्रव्यूह कसं भेदायचं मला माहीत आहे, असं सांगतानाच रात्र वैऱ्याची आहे, सावध राहा, असं आवाहन पंकजा यांनी केलं.
माझ्याकडे आता कोणतंही पद नाही. आमदारकी नाही की साधी ग्रामपंचायतीची सदस्यही नाही. आता पंकजा मुंडेंचं राजकारण संपलं आहे. त्या पुन्हा येणार नाहीत, अशा वावड्या काही लोकांनी उठवल्या. पण लोकांची ही गर्दी पाहून त्यांचा भ्रमनिरास झाला असेल, असा टोलाही त्यांनी लगावला.
जोपर्यंत मी जीवंत आहे. तोपर्यंत भगवान गडावर येणार. मी आज आमदार नाही. ग्रामपंचायतीची सदस्यही नाही. पण तुम्ही खचून जाऊ नका. मी तुमच्या जीवावरच उभी आहे, असं सांगतानाच मी तुमच्यासोबत आहे. महाराष्ट्रभर फिरणार आहे. ज्यांच्या डोळ्यात अश्रू आणि पोटात भूक आहे, अशा शेवटच्या माणसासाठी मी झटणार आहे, अस पंकजा मुंडे म्हणाल्या.
सध्या रात्र वैऱ्याची आहे. त्यामुळे सजग राहा. आपली वज्रमुठ कायम ठेवा. आपली वज्रमुठ कायम असेल तर मोठमोठी सत्ताही हादरून जाते. आपल्याला धर्मकारण आणि राजकारणाची सांगड घालायची आहे. या दोन्ही गोष्टी एकत्र केल्याशिवाय समाजाचा विकास होऊच शकत नाही. आपल्याला राज्यात 120 आमदार बनवायचे आहेत, असं त्या म्हणाल्या.
आता मी राज्यात फिरणार आहे. गावोगावी जाऊन पाहणी करणार आहे. कोरोना असला तरी फिरणार आहे. रस्त्यावर कसं उतरायचं हे मला चांगलंच माहीत आहे. आता नुसतं भगवान गडावरच नाही तर आपल्याला मुंबईतलं शिवाजी पार्कही भरवायचं आहे. आपली शक्ती दाखवून द्यायची आहे, अशी घोषणा त्यांनी करताच पंकजा मुंडे जिंदाबादच्या घोषणांनी संपूर्ण परिसर दणाणून गेला. (pankaja munde on her political career)
VIDEO : Pankaja Munde | दहा हजार कोटीच्या पॅकेजसाठी मुख्यमंत्र्यांचे स्वागत, पण पॅकेज पुरेसं नाही : पंकजा मुंडेhttps://t.co/YMUXMlTgBg
— TV9 Marathi (@TV9Marathi) October 25, 2020
संबंधित बातम्या:
(pankaja munde on her political career)