Ambani Family : अंबानींच्या घरच्या गणेशोत्सवात काय-काय होतं, स्पेशल मेन्यू व्हायरल

केवळ भारतातील नव्हे तर आशियातील सर्वात श्रीमंत कुटुंब अशी ख्याती असलेलं अंबानी कुटुंब (Ambani Family) नेहमी चर्चेत असतं. दरवर्षीप्रमाणे यंदाही अंबानींच्य अँटिलियामध्ये गणेशोत्सव थाटामाटात, राजेशाही अंदाजात पार पडला. या उत्सवासाठी अँटिलियाची खास सजावट करण्यात आली होती, त्याचे अनेक फोटो, व्हिडीओ सोशल मीडियावर व्हायरल झाले. दरवर्षीप्रमाणे बॉलिवूडमधील अनेक सेलिब्रिटी, उद्योजक, राजकारणी यांनी अंबानी कुटुंबांच्या सोहळ्याला हजेरी लावत गणरायाचे आशीर्वाद घेतले. आकर्षक सजावट, पारंपरिक पूजा-विधी आणि उत्साहपूर्ण वातावरणासोबतच अँटिलियातील पाहुण्यांसाठी खास मेजवानीचीही व्यवस्था करण्यात आली होती.

यंदाच्या खाद्यपदार्थांच्या मेन्यूचं खास वैशिष्ट्य म्हणजे त्यामध्ये फक्त एका राज्यातील पदार्थांचा समावेश नव्हता. महाराष्ट्रापासून गुजरातपर्यंत, दक्षिण भारतीय पदार्थांपासून चटपटीत चाट आणि इंडो-चायनीज पदार्थांपर्यंत विविध चवींचा समावेश या मेन्यूमध्ये करण्यात आला होता. त्यामुळे पाहुण्यांना एकाच ठिकाणी देशाच्या वेगवेगळ्या भागांतील लोकप्रिय पदार्थांचा आस्वाद घेता आला. विविध स्वादिष्ट पदार्थ खाऊन पाहूणएही तृप्त झाले. चला जाणून घेऊया यंदा अँटिलियात काय होता मेन्यू ?

देशी पेयांनी पाहुण्यांचं स्वागत

गणेशोत्सवासाठी येणाऱ्या पाहुण्यांचे सुरुवातीला विविध थंडगार आणि ताजेतवाने पेयांनी स्वागत करण्यात आलं. यामध्ये डाळिंब पन्हं, कैरी पन्हं आणि लस्सीचा समावेश होता. कैरी पन्ह्याचा आंबट-गोड स्वाद आणि लस्सीची थंडगार चव भारतीय खाद्यसंस्कृतीचा खास भाग मानली जाते. या पारंपरिक पेयांमुळे मेजवानीची सुरुवातही अगदी देशी अंदाजात झाली.

मिसळ पाव आणि बटाटा वडा, महाराष्ट्राचा दिसला खास अंदाज

महाराष्ट्रीय खाद्यपदार्थांचा नाव काढलं आणि मिसळ पाव नाही, असं कसं होईल? अंबानी कुटुंबाच्या या खास मेन्यूमध्ये मिसळ पावसोबत कोथिंबीर वडी आणि बटाटा वड्याचाही समावेश होता. एवढंच नव्हे तर वड्यासोबत खास लसूण चटणीनेही स्वाद वाढवला. त्यामुळे महाराष्ट्रातील लोकप्रिय नाश्त्याचा अस्सल स्वाद पाहुण्यांना एकाच ठिकाणी चाखता आला.

गुजराती पदार्थांमध्येही विविधता

गुजराती खाद्यसंस्कृतीलाही या मेन्यूमध्ये विशेष स्थान देण्यात आले होते. यामध्ये चोखा आणि मक्कीची खीचू, सांभरियू, पट्टी समोसा आणि मेथी ढोकळा यांसारख्या पदार्थांचा समावेश होता. मेथी ढोकळा आणि खीचूसारखे पदार्थांनी या मेन्यची खासियत वाढवली. हलकी, चविष्ट आणि पारंपरिक चव ही या पदार्थांची खास ओळख आहे.

साऊथ इंडियन पदार्थांनीही वेधून घेतलं लक्ष

दक्षिण भारतीय खाद्यपदार्थ आवडणाऱ्या पाहुण्यांसाठीही मेन्यूमध्ये अनेक पर्याय ठेवण्यात आले होते. रसम वडा, घी पोडी इडली आणि बिसी बेळे भात यांचा यात समावेश होता. त्यासोबत बूंदीही होती. दक्षिण भारतातील वेगवेगळ्या चवींनी पाहुण्यांचं लक्ष वेधून घेतलं.

चाटप्रेमींसाठी चटपटीत पर्याय

चाटशिवाय भारतीय मेजवानी पूर्ण होणं तसं कठीणच! त्यामुळे या खास मेन्यूमध्ये चाटप्रेमींसाठीही अनेक पर्याय ठेवण्यात आले होते. टोमॅटो चाट, स्पायसी रगुल्ला, आलू कचोरी आणि लाल चणा चाट यांचा त्यात समावेश होता. या पदार्थांमध्ये आंबट, गोड आणि तिखट अशा विविध चवींचा संगम पाहायला मिळाला. त्यामुळे चटपटीत पदार्थांची आवड असलेल्या पाहुण्यांसाठीही मेन्यूमध्ये भरपूर पर्याय उपलब्ध होते.

Ambani Ganpati celebration was so Grand 🔥😍

Specially the food . First in my bloodline to eat SPICY RASGULLA 💀🔥.

The menu was outstanding . https://t.co/TEkPLWqAK6 pic.twitter.com/hFSsOoIx6l

— Jeet (@JeetN25) September 15, 2026

इंडो-चायनीज पदार्थांनाही खासं स्थान

पारंपरिक भारतीय पदार्थांसोबतच इंडो-चायनीज पदार्थांचाही अंबानींच्या घरातील या मेन्यूमध्ये समावेश करण्यात आला होता. यामध्ये वोक टॉस्ड चिली पनीर, गोल्डन व्हेज स्प्रिंग रोल आणि शेजवान नूडल्स यांसारखे लोकप्रिय पदार्थ होते. . त्यामुळे भारतीय पारंपरिक पदार्थांपेक्षा काही वेगळे खाण्याची इच्छा असलेल्या पाहुण्यांना वेगळे पदार्थ मिळाले,

एकाच मेन्यूत अनेक राज्यांचा स्वाद

अंबानी कुटुंबाच्या गणेशोत्सवातील ही मेजवानी विशेष ठरण्याचे कारण म्हणजे या मेन्यूमधील वैविध्य. महाराष्ट्रातील लोकप्रिय नाश्त्यापासून गुजराती पदार्थांपर्यंत, दक्षिण भारतीय व्यंजनांपासून चटपटीत चाट आणि इंडो-चायनीज पदार्थांपर्यंत विविध चवींचा समावेश करण्यात आला होता.