साताऱ्याचा नादच खुळा, ग्रामपंचायत निवडणूक प्रचाराला अभिनेत्री प्रिया बेर्डेंचा रोड शो
मतदारांना आकर्षित करण्यासाठी गावांमधील पॅनल आणि मंडळं नवनवीन शक्कल लढवत असल्याचं दिसून येतंय. साताऱ्यात देखील असंच एक उदाहरण पाहायला मिळालं.
सातारा : सध्या राज्यात ग्रामपंचायत निवडणुकींचा ज्वर चढलाय. लोकसभा निवडणुकीतील वातावरण सामान्य वाटावं इतकं निवडणूक असलेल्या गावातील प्रचाराचं वातावरण तापलंय. त्यातच मतदारांना आकर्षित करण्यासाठी गावांमधील पॅनल आणि मंडळं नवनवीन शक्कल लढवत असल्याचं दिसून येतंय. साताऱ्यात देखील असंच एक उदाहरण पाहायला मिळालं (Actress Priya Berde campaign for Grampanchayat Election in Vade Satara).
सातारा शहरालगत असणाऱ्या वाढे गावात ग्रामपंचायत निवडणुकीचा प्रचार अंतिम टप्प्यात मतदारांना आकर्षित करण्यासाठी प्रत्येक पॅनेल वेगवेगळी शक्कल लढवताना दिसला. वाढे गावातील वाढेश्वर अजिंक्य पॅनेलने तर यावेळी निवडणूक प्रचारासाठी थेट अभिनेत्री प्रिया बेर्डे यांनाच आवताण दिलं. प्रिया बेर्डे यांचा जिप्सी गाडीतून गावात रोड शो घेऊन प्रचाराची सांगता केली. यावेळी प्रिया बेर्डे यांना पाहण्यासाठी वाढे गावासह परिसरातील नागरिकांनी मोठी गर्दी केली. यामुळे गावात होणाऱ्या दुरंगी लढतीकडे सर्वांचेच लक्ष लागलेय.
वाढे गावात ग्रामपंचायत निवडणुकीत वाढेश्वर अजिंक्य पॅनेल आणि अजिंक्य पॅनेल वाढे अशी दुरंगी लढत पहायला मिळत आहे. गावात 11 सदस्य संख्येची ग्रामपंचायत आहे. सध्या अनुसुचित जमातींची व्यक्ती गावात नसल्यामुळे 10 जागांवर ही निवडणूक लढवली जात आहे. दोन्ही पॅनेलकडून समोरासमोर एकूण 20 उमेदवार रिंगणात आहेत. या गावात पाणी योजना, गावातील बंदिस्त गटारे, गावची विकासाची प्रलंबित कामे अशा मुद्द्यांवर ही निवडणूक होतेय. दोन्ही पॅनेल ताकदीने निवडणूक लढत आहेत. यामुळे गावात होणाऱ्या या दुरंगी लढतीचा निकाल काय लागतो याकडे सर्वांचेच लक्ष लागले आहे.
हेही वाचा :
नक्षलवाद्यांकडून ग्रामपंचायत निवडणूक उधळण्याचा डाव उघड, गोंदियात पुरुन ठेवलेली स्फोटकं जप्त
आईला चिन्हं आलं ऑटो, पठ्ठ्यानं ऑटोच घरावर ठेवला !
Actress Priya Berde campaign for Grampanchayat Election in Vade Satara