उमेश कोल्हेंची हत्या नुपूर शर्मांच्या समर्थनातूनच! आरोपींनी टेररिस्ट गँग तयार केली होती? NIA च्या आरोपपत्रात आणखी काय खुलासा?
अमरावतीत 21 जून रोजी उमेश कोल्हे यांची निर्घृण हत्या करण्यात आली होती.
अमरावतीः भाजप प्रवक्त्या नुपूर शर्मा (Nupur Sharma) यांच्या समर्थनार्थ पोस्ट टाकल्यामुळेच उमेश कोल्हे (Umesh Kolhe) यांची हत्या झाली होती, असा खुलासा NIA ने केला आहे. कोल्हेंच्या हत्येसंदर्भात महत्त्वाची अपडेट समोर आली आहे. अमरावतीचे फार्मासिस्ट उमेश कोल्हे प्रकरणात नॅशनल इंटेलिजन्स एजन्सी अर्थात NIA ने ११ जणांविरोधात आरोपपत्र दाखल केलंय.
उमेश यांनी भाजपाच्या प्रवक्त्या नुपूर शर्मा यांचे समर्थन करणारी पोस्ट सोशल मीडियावर व्हायरल केली होती. एनआयएने ११ जणांविरोधात आरोपपत्र दाखल केलंय. आरोप पत्रात दावा केलाय की, मोहम्मद पैगंबर यांच्याविषयी केलेल्या वादग्रस्त वक्तव्याचं समर्थन करणाऱ्या व्हॉट्सअप पोस्ट उमेश यांनी शेअर केल्या होत्या. त्याचाच बदला घेण्यासाठी आरोपींनी एक टेररिस्ट गँग तयार केली होती.
विशेष एनआयए कोर्टात हे आरोपपत्र सादर करण्यात आलं. उमेश कोल्हेंचे मारेकरी फरार असून त्यांचा तपास सुरु ठेवावा, अशी एनआयएची विनंती कोर्टाने मान्य केली.
या आरोपपत्रात अब्दुल शेख, मोहम्मद शोएब, आतिब राशिद, युसूफ खान, इरफान खान, अब्दुल अरबाज, मुशफिक अहमद, शेख शकील, शाहिम अहमद, मुदस्सिर अहमद आणि शाहरूख खान यांचा समावेश आहे. या सर्वांना अटक करण्यात आली आहे.
एनआयएने काय म्हटलंय?
एनआयएने आरोपपत्रात म्हटलंय, 21 जून 2022 रोजी अमरावतीच्या घंटाघर परिसरात आरोपींनी दहशत पसरवण्याच्या हेतूने उमेश कोल्हे याची निर्घृण हत्या केली. केंद्रीय गृह मंत्रालयाच्या आदेशानुसार, एनआयएने भारतीय दंड संहितेच्या कलम 120, 302, 153-अ सहित इतर कलमांनुसार, 2 जुलै रोजी गुन्हा दाखल केला होता.
आतापर्यंत काय घडलं?
एका वृत्तवाहिनीवरील कार्यक्रमात भाजप प्रवक्त्या नुपूर शर्मा यांनी मोहम्मद पैगंबर यांच्याविरोधात वादग्रस्त वक्तव्य केलं होतं. त्यानंतर त्यांच्या विरोधात अनेक ठिकाणी निषेध करण्यात आला. नुपूर शर्मा यांना जीवे मारण्याची धमकीही आली होती. भाजपने नुपूर शर्मा यांची पक्षातून हकालपट्टी केली होती. मात्र नुपूर शर्मांच्या समर्थनार्थ काहींनी सोशल मीडियावर पोस्ट व्हायरल केल्या होत्या. उमेश कोल्हेदेखील त्यापैकीच एक होते. या पोस्टमुळेच कोल्हे यांची हत्या करण्यात आल्याचा आरोप करण्यात आला होता. या प्रकरणी एनआयएने दाखल केलेले हे पहिले आरोपपत्र आहे.