‘सुषमा अंधारे, राखी सावंत, दोघी बहिणी’, भाजप नेत्याची टीका जिव्हारी लागणार?

गिरीश गायकवाड, मुंबई : संजय शिरसाट (Sanjay Shirsat) आणि सुषमा अंधारे (Sushma Andhare) यांच्यातील वाद विकोपाला गेले असतानाच एका भाजप नेत्याने सुषमा अंधारे यांच्यावर आणखी एक जहरी टीका केली आहे. शिवसेनेच्या उपनेत्या सुषमा अंधारे यांची तुलना सिने अभिनेत्री राखी सावंत हिच्याशी केली आहे. दोघी बहिणी बहिणी असून एकमेकींच्या प्रतिस्पर्धीदेखील आहेत, असं वक्तव्य भाजप नेते मोहित कंबोज यांनी केलंय. शिवसेनेत प्रवेश केल्यापासून सुषमा अंधारे या ठाकरे गटाच्या फायरब्रँड नेत्याच बनल्या आहेत. शिंदे गट आणि भाजप नेत्यांवर त्या कडाडून टीका करतात. यामुळे माध्यमांतूनही त्या वारंवार झळकतात. यावरूनच मोहित कंबोज यांनी ही टीका केली आहे.

कंबोज यांचं ट्विट चर्चेत

ठाण्यातील रोशनी शिंदे मारहाण प्रकरणात महाविकास आघाडीतर्फे काल भव्य मोर्चा काढण्यात आला. या प्रकरणात उद्धव ठाकरे यांनी आधीही देवेंद्र फडणवीसांना फडतूस असे संबोधून राजकारण तापवलंय. त्यातच कालच्या मोर्चात सुषमा अंधारे यांनीदेखील उपमुख्यमंत्री देवेंद्र फडणवीस यांच्यावर टीका केली. त्यांच्या याही भाषणाची ठाण्यात चर्चा आहे. यानंतर आज मोहित कंबोज यांनी सुषमा अंधारे यांच्यावरच टीकास्त्र डागले आहे. अंधारेंवर खोचक टीका करणारं ट्विट त्यांनी केलंय. त्यात त्यांनी लिहिलंय-

सुषमा अंधारे और राखी सावंत दोनों बहन हैं …

एक बहन महाराष्ट्र की राजनीति में और दूसरी बहन महाराष्ट्र सिनेमा में …..

दोनों एक दूसरे की प्रतियोगी भी हैं की रोज़ ज़्यादा
सनसनी कौन मचाई गा !

राखी सावंत ही अभिनेत्रीदेखील अनेक वादग्रस्त वक्तव्य करून नेहमी चर्चेत असते. त्याप्रमाणेच सुषमा अंधारेदेखील सनसनी वक्तव्यांतून चर्चेत असतात, अशा आशयाचं ट्विट मोहित कंबोज यांनी केलंय.

ठाण्यात तुफ्फान फटकेबाजी

ठाण्यातील महामोर्चात सुषमा अंधारे यांनी देवेंद्र फडणवीस आणि भाजपला टार्गेट केलं. भाजप आणि शिंदे गटातील नेत्यांकडून महाराष्ट्रातील महापुरुषांचा वारंवार अवमान केला गेला. मात्र तेव्हा कार्यकर्ते चेकाळले नाहीत. मात्र उद्धव ठाकरेंनी फडतूस म्हणताच या शब्दावर भक्तगण चेकाळले. भक्तगणांचा चॉइसच फडतूस आहे, अशी टीका काल सुषमा अंधारे यांनी केली. त्यावरून मोहित कंबोज यांनी केलेल्या टीकेला सुषमा अंधारे काय उत्तर देतात, याकडे सर्वांचं लक्ष लागलंय.