केतनचं सियावर प्रचंड प्रेम होतं, लग्नाआधीच त्याने… वडिलांनी केला नवा खुलासा
सिया आणि चेतनने एका फेक इन्स्टाग्राम अकाऊंटचा वापर करून केतनला लोहगडवर बोलावलं आणि कट रचून त्याला दरीतून खाली ढकललं, असा पोलिसांनी आरोपपत्रात उल्लेख केला आहे.
पुण्यातील लोहगड किल्ल्यावर केतन अग्रवालच्या मृत्यू प्रकरणात धक्कादायक माहिती समोर आली आहे. केतनने त्याची होणारी बायको सिया गोयलला वाढदिवसाचं सरप्राईज देण्यासाठी पाठीवर तिचं नाव गोंदवलं होतं. कुटुंबीय लग्न आणि साखरपुड्याच्या तयारीत असतानाच केतनच्या हत्येचा कट रचला गेल्याचा आरोप आहे. पोलिसांच्या आरोपपत्रानुसार, सिया गोयल आणि तिचा प्रियकर चेतन चौधरी यांनी फेक इन्स्टाग्राम अकाऊंटच्या माध्यमातून केतनला लोहगडवर बोलावून त्याला दरीत ढकलल्याचा आरोप आहे.
पुण्यातील लोहगड किल्ल्यावर मृत झालेल्या केतन अग्रवालचे वडील विशाल अग्रवाल यांनी सांगितलं की, केतनने त्याची होणारी बायको सिया गोयल हिला वाढदिवसाचं सरप्राईज देण्यासाठी स्वतःच्या पाठीवर तिचं नाव गोंदवून घेतलं होतं. ज्यावेळी केतनच्या खुनाचा कट रचला जात होता, तेव्हा त्याचे कुटुंबीय सियाचा वाढदिवस आणि लग्नाच्या तयारीत मग्न होते. कुटुंबाला सियाच्या डोक्यात काय शिजतंय, याचा अजिबात संशय आला नाही.
विशाल अग्रवाल म्हणाले की, कुटुंबाने सियाला आपली सून म्हणून स्वीकारलं होतं. साखरपुड्याची जोरदार तयारी सुरू होती. “खरेदीला गेलो तेव्हा आम्ही सियाच्या पसंतीचे तब्बल २८ ड्रेस आणि १५ सोन्याचे सेट घेतले होते,” असं ते म्हणाले. केतन आणि सियाचा फेब्रुवारीत साखरपुडा झाला होता आणि याच वर्षी लग्न होणार होतं. केतनने १९ जूनला महाबळेश्वरमध्ये सियाचा वाढदिवस साजरा करण्याचं खास प्लॅनिंग केलं होतं. पण त्याआधीच होत्याचं नव्हतं झालं.
१८ जूनला लोहगड किल्ल्यावर केतनचा मृत्यू झाला. सुरुवातीला हा अपघात असल्याचं भासवण्यात आलं. मात्र, पुणे ग्रामीण पोलिसांनी या प्रकरणाचा छडा लावत सिया गोयल आणि तिचा प्रियकर चेतन चौधरी याला अटक केली. पोलिसांच्या आरोपपत्रानुसार, सिया आणि चेतनने एका फेक इन्स्टाग्राम अकाऊंटचा वापर करून केतनला लोहगडवर बोलावलं आणि कट रचून त्याला दरीतून खाली ढकललं. धक्कादायक म्हणजे, याच ठिकाणी याआधीही केतनला मारण्याचा प्रयत्न झाला होता. लेकाच्या लग्नाची स्वप्न पाहणाऱ्या अग्रवाल कुटुंबाला या विश्वासघाताने मोठा मानसिक धक्का बसला आहे
