ठाण्यात गरब्याच्या भर कार्यक्रमात शिंदेंच्या शाखाप्रमुखावर त्याने बंदूक रोखली अन्… नेमकं काय घडलं?

Garba

Image Credit source: Tv9 Network

सर्वत्र नवरात्र उत्सव मोठ्या आनंदात साजरा केला जातो. ठाण्यातील उल्हासनगर येथे रंगलेला आनंदी नवरात्रोत्सवर दहशतीमध्ये अचानक बदलला. एका गरबा कार्यक्रमात सराईत गुन्हेगाराने शिवसेना शाखाप्रमुखावर बंदूक दाखवत हवेत गोळीबार केला. या घटनेमुळे सर्वत्र एकच गोंधळ उडाला. पोलिसांना याबाबत माहिती मिळताच पोलीस घटनास्थळी पोहोचली आणि त्यांनी तातडीने कारवाी केली आहे.

नेमकं काय घडलं?

उल्हासनगरमध्ये मंगळवारी कॅम्प 2 मधील 24 नंबर शाळा परिसरात बंजारा विकास परिषद येथे बालाजी मित्र मंडळ गरबा आयोजित करतो. या गरब्याचे आयोजक शिवसेना शाखाप्रमुख बाळा भगुरे हे आहेत. त्यांना स्थानिक सराईत गुन्हेगार सोहम पवार याने गरब्याच्या ठिकाणी रात्री साडे अकरा ते पावणे बारा वाजता अडवले. त्यानंतर सोहमे बाळा यांना प्रश्न विचारला की, “गरब्याला माझ्याकडून परवानगी घेतली का? मी इकडचा भाई आहे?” त्यानंतर तेथे उपस्थित असलेले सर्वजण घाबरले. सोहमने त्याच्या जवळ असलेली बंदूक काढली आणि बाळा भगुरे यांच्यावर निशाणा साधला.

वाचा: अभिनेत्री तेजश्री प्रधानची एकूण संपत्ती किती? ऐकून फुटेल घाम

गुन्हेगार सोहमच्या कृत्याने गरब्यात एकच खळबळ उडाली. बाळा यांच्या भावाने प्रसंगावधान दाखवत मध्यस्थी केली.मात्र, चिडलेल्या सोहमने दहशत माजवण्यासाठी त्याच्या कडे असलेल्या बंदुकीतून हवेत दोन गोळ्या झाडल्या. यावेळी सोहमचा वडील अनिल पवारही दहशत निर्माण करण्यासाठी सोहमच्या बाजूने उभा असल्याचे पोलिसांनी सांगितले. घटनेची माहिती उल्हासनगर पोलिस ठाण्याचे वरिष्ठ पोलिस निरीक्षक संतोष आव्हाड यांना मिळताच त्यांनी तत्काळ पोलिस पथकासह घटनास्थळ गाठत तपास सुरू केला आहे. या प्रकरणी बाळा भगुरे यांच्या तक्रारीवरून उल्हासनगर पोलिस ठाण्यात गुन्हा दाखल करीत तपास सुरू केला आहे.

पोलिसांनी केली आरोपीला अटक (Thane Crime News)

दरम्यान, बुधवारी पोलिसांनी वेगाने कारवाई केली. त्यांनी कॅम्प क्रमांक 4 येथून आरोपी सोहम पवार (वय 19) आणि त्याचे वडील अनिल पवार या दोघांना अटक केली. पोलिसांनी या दोघांकडून पिस्तुल जप्त केले आहे. या घटनेमुळे नवरात्रोत्सवाच्या आनंदाला आळा बसला असून, पोलिसांनी पुढील तपास सुरू केला आहे.