विजेचा झटका लागला आणि थेट टाकीत.. पाण्यालाही करंट; 21 वर्षीय तुरुणाचा भयानक मृत्यू
एक धक्कादायक प्रकरण समोर आले आहे. एका तरुणाला बांधकामस्थळी विजेचा झटका लागला. त्यामुळे तो पाण्याच्या टाकीत पडला. पण त्याच्या हातात विजेची तार असल्यामुळे संपूर्ण पाण्याच करंट पास होत होता.
सोमेश्वार कानकाटे हा स्थानिक रहिवासी असून तो बांधकामस्थळी काम करत होता. सोमवारी सकाळी तो वीजपंप सुरू करण्याच्या प्रयत्नात होता. त्यावेळी त्याला अचानक जोरदार विजेचा धक्का बसला. धक्क्याने त्याचा तोल गेला आणि तो पाण्याने भरलेल्या टाकीत कोसळला. त्याच्या हातात असलेली उघडी विद्युत वायरही टाकीत पडली. त्यामुळे पाण्यातही वीजप्रवाह उतरला आणि परिस्थिती अधिक गंभीर झाली.
नेमकं काय घडलं?
घटनेची चाहूल लागताच परिसरातील स्थानिक युवकांनी तातडीने धाव घेतली. त्यांनी फ्यूज काढून वीजप्रवाह बंद केला आणि सोमेश्वरला टाकीतून बाहेर काढले. त्यानंतर त्याला तातडीने उपचारासाठी जवळच्या रुग्णालयात दाखल करण्यात आले. मात्र डॉक्टरांनी त्याला मृत घोषित केले. वैद्यकीय अधिकाऱ्यांच्या मते, विजेच्या तीव्र धक्क्यामुळे आणि पाण्यात बुडल्यामुळे मृत्यू झाला असल्याचे सांगितले जात आहे.
या दुर्घटनेची माहिती मिळताच पोलिसांनी घटनास्थळी धाव घेतली. पोलिसांनी प्राथमिक चौकशी सुरू केली असून मृत्यूची नेमकी कारणे जाणून घेण्यासाठी पोस्टमॉर्टमची प्रक्रिया सुरू करण्यात आली आहे. बांधकामस्थळी सुरक्षिततेच्या उपाययोजनांबाबतही चौकशी केली जाणार आहे. स्थानिक नागरिकांनी बांधकामस्थळी विद्युत सुरक्षिततेबाबत अधिक दक्षता बाळगण्याची मागणी केली आहे.
पोलिसांनी सुरु केली चौकशी
सोमेश्वर कानकाटेच्या कुटुंबीयांना या दुःखद घटनेचा मोठा धक्का बसला आहे. परिसरातील रहिवासी आणि ओळखीच्या व्यक्तींनी त्याच्या कुटुंबाला सांत्वन दिले आहे. युवकाच्या अकाली मृत्यूमुळे संपूर्ण परिसरात शोककळा पसरली आहे. नागरिकांनी अशा प्रकारच्या दुर्घटना टाळण्यासाठी बांधकामस्थळी विद्युत उपकरणांची नियमित तपासणी आणि सुरक्षिततेच्या नियमांचे पालन करण्याचे आवाहन केले आहे. ही घटना विजेच्या बेजबाबदार वापरामुळे होणाऱ्या दुर्घटनांची आठवण करून देणारी आहे. नाशिक पोलिसांनी चौकशी पूर्ण करून नेमकी कारणे उघड करण्याचे आश्वासन दिले आहे.
