भोंदू बाबा अशोक खरात प्रकरणात मोठी घडामोड, नॉट रिचेबल असलेला मुलगा…

आध्यात्मिक गुरुच्या नावाखाली महिलांचे लैंगिक शोषण आणि कोट्यवधींचा आर्थिक गैरव्यवहार करणाऱ्या भोंदू बाबा अशोक खरात प्रकरणी मोठी घडामोड समोर आली आहे. गेल्या काही दिवसांपासून नॉट रिचेबल असलेला अशोक खरातचा मुलगा हर्षवर्धन खरात हा पुन्हा एकदा विशेष तपास पथकाच्या (SIT) संपर्कात आला आहे. त्यामुळे पोलिसांना मोठे यश मिळाले आहे. आज एसआयटीकडून हर्षवर्धन खरात आणि अशोक खरातची मुलगी या दोघांचीही कसून चौकशी केली जाणार आहे.

अशोक खरातला अटक झाल्यापासून त्याच्या कुटुंबातील सदस्य पोलिसांच्या रडारवर होते. अशोक खरातच्या कुटुंबातील सदस्यांची भूमिका सातत्याने संशयास्पद वाटत होत्या. त्यातच काही दिवसांपूर्वी हर्षवर्धन खरातने वडील अशोक खरात यांच्याबद्दल धक्कादायक खुलासा केला होता. आमच्या घरात मोठ्या प्रमाणात कॅश यायची. हे पैसे कुठून आणि कसे यायचे याबद्दल मला माहिती नाही. पण डॅड या कॅशचे नियोजन करायचे. त्यांना प्रत्येक व्यवहाराची माहिती होती, अशी कबुली हर्षवर्धन खरातने दिली होती.

हर्षवर्धन खरातने दिलेल्या कबुलीनंतर त्याला पोलिसांनी सोडून दिलं होतं. मात्र, त्यानंतर तो अचानक गायब झाला होता. यामुळे पोलिसांची धावपळ उडाली होती. मात्र आता तो पुन्हा संपर्कात आल्याने पोलिसांना या रॅकेटमधील महत्त्वाचे दुवे हाती लागण्याची शक्यता आहे. पण अशोक खरातची पत्नी कल्पना खरात ही अद्यापही फरार असून पोलीस तिचा शोध घेत आहेत.

आज पोलीस कोठडीचा शेवटचा दिवस

दरम्यान अशोक खरातच्या न्यायलयीन कोठडीची मुदत आज संपत आहे. त्यामुळे आजचा दिवस तपासाच्या दृष्टीने अत्यंत महत्त्वाचा ठरणार आहे. उद्या (बुधवारी) अशोक खरातला पुन्हा न्यायालयात हजर केले जाणार आहे. अशोक खरातने जमवलेली बेनामी मालमत्ता, आर्थिक गैरव्यवहाराचे पुरावे आणि पीडित महिलांचे जबाब नोंदवण्याचे काम एसआयटीकडून युद्धपातळीवर सुरू आहे.

या संपूर्ण प्रकरणाने नाशिकमध्ये खळबळ उडाली आहे. त्यातच आज विशेष तपास पथक (SIT) एक महत्त्वाची पत्रकार परिषद घेणार आहे. या परिषदेत अशोक खरातचे गुन्हे, त्याच्या मुला-मुलीच्या चौकशीतून काय निष्पन्न झाले आणि तपासात आतापर्यंत कोणकोणती माहिती समोर आली, याबद्दलचा खुलासा केला जाण्याची शक्यता आहे.