Nashik TSC Scandal : नवीन आलेल्या तरूणींना ते… कंपनीतील छळ, धर्मांतरण प्रकरणात पीडितेचे धक्कादायक खुलासे
TCS नाशिक प्रकरणात पीडितेने धक्कादायक खुलासे केले आहेत, ज्यात धार्मिक कट्टरता आणि मानसिक छळाचे आरोप आहेत. कार्यस्थळी अश्लील शेरेबाजी आणि पाठलाग केल्याचा दावा केला असून, यामुळे POSH कायद्याच्या अंमलबजावणीवर प्रश्नचिन्ह निर्माण झाले आहे. SIT तपास सुरू असून, सहा संशयितांनी अटकपूर्व जामिनासाठी अर्ज केला आहे. हेल्पलाईनवरही अनेक तक्रारी प्राप्त झाल्या आहेत.
नाशिकमधील टीसीएस कंपनीतील लैंगिक शोषण आणि धर्मांतरणाचा प्रयत्न झाल्याचे प्रकरण उघडकीस आल्यापासून मोठी खळबळ माजली आहे. तिथे काम करणाऱ्या महिलांशी असभ्य वर्तन, त्यांचे शोषण करणे, एका विशिष्ट धर्माचे पालन करणे,तसे कपडे घालणे यासाठी त्यांच्यावर दबाव टाकण्यात आला होता. या केसमधेये आत्तापर्यंत 7 ते 8 जणांना अटक करण्यात आली असली तर कंपनीची एचआर निदा खान ही अजूनही फरार आहे. या प्रकरणात रोज नवनवे खुलासे होत असून अनेक पीडितांनी पुढे येऊन आपबिती कथन केली आहे. या TSC प्रकरणात SIT ने हेल्पलाईन नंबर जारी केला असून त्यावर देखील काही तक्रारी आल्या आहेत. 20 हुन अधिक तक्रारी आतापर्यंत प्राप्त झाल्याची माहिती सूत्रांनी दिली.
नवीन तरुणींना ‘प्लेअर’ म्हणून हिणवल्याचे आरोप
याच केसमध्ये आता एक आणखी नवी अपडेट समोर आली आहे. टीसीएस प्रकरणात पीडितेने धक्कादायक खुलासा केला आहे. धार्मिक कट्टरता आणि वैयक्तिक आयुष्यावर अश्लील शेरेबाजी करण्यात आल्याचा आरोप तिने केला आहे. कंपनीमध्ये प्रशिक्षण काळातच संशयितांकडून मानसिक छळ सुरू असल्याचा दावाही तिने केला. पीडितेच्या सांगण्यानुसार, ऑफिसमध्ये नवीन आलेल्या तरुणींना आरोपींकडून ‘प्लेअर’ म्हणून हिणवण्यात यायचं. तसेच आरोपी त्यांना अश्लील प्रश्न विचारायचे, नको ते हावभाव करायचे आणि जवळीक साधण्याचा प्रयत्नही व्हायचा असा आरोप पीडितेने केला आहे.
एवढंच नव्हे तर धर्मावर आक्षेपार्ह वक्तव्य करत भावना दुखावल्याचा आरोप तिने केला. पीडितेच्या तक्रारीनुसार, तिचा पाठलाग करून बाहेर भेटण्यास दबाव टाकण्यात आला होता. जून 2025 ते मार्च 2026 दरम्यान तिला सतत छळ सहन करावा लागला, असा दावाही तिने केला.
यामुळे कार्यस्थळी सुरक्षेवर आणि POSH कायद्याच्या अंमलबजावणीवर प्रश्नचिन्ह उपस्थित झालं आहे. पीडित तरूणीने जे आरोप केलेत, SIT तपासात या आरोपांची पडताळणी करण्यास सुरूवात झाली आहे.
सहा संशयितांचा जामिनासाठी अर्ज
दरम्यान टीसीएस प्रकरणात सहा संशयितांनी अटकपूर्व जामिनासाठी जिल्हा व सत्र न्यायालयात अर्ज दाखल केला आहे. या अर्जावर येत्या 2 तारखेला सुनावणी होणार आहे. याच कंपनीतील एचआर, संशयित निदा खानच्या वतीने देखील अटकपूर्व जामिनासाठी अर्ज करण्यात आला होता. मात्र न्यायालयाने सुनावणी 27 तारखेपर्यत पुढे ढकलली . आता इतर अटकेत असलेल्या 6 संशयित आरोपीच्या वतीने देखील जामिनीसाठी अर्ज दाखल करण्यात आला आहे. दानिश शेख, आसिफ अन्सारी,तौसिफ अत्तार,शाहरुख कुरेशी, रजा मेमन आणि शफी शेख या संशयित आरोपींनी जामीन मिळावा यासाठी कोर्टात अर्ज दाखल केला आहे.
हेल्पवलाईनवर आल्या अनेक तक्रारी
नाशिक TSC प्रकरणात SIT कडून तपास सुरू असून याप्रकरणी जारी करण्यात आलेल्या हेल्पलाईन नंबवर देखील तक्रारी आल्या आहेत. आत्तापर्यंत 20 हून अधिक तक्रारी प्राप्त झाल्याची माहिती सूत्रांनी दिली आहे. अनेक तक्रारी धार्मिक भावना दुखावल्या संदर्भात आहेत. यासंदर्भात तक्रारी प्राप्त होत असल्या, तरी पुढे येऊन गुन्हा दाखल करण्यास मात्र कोणी तयार नसल्याने कारवाई करण्यास अडचण येत आहे.
