सांगली पूर : बचावकार्यावेळी महापालिकेची बोट अडकली, नगरसेवकासह सहा जण पाण्यात पडले

सांगलीत बोट अडकून सहा जण पाण्यात पडले

सांगली : सांगलीतील पुराच्या पाण्यात बचावकार्य करताना महापालिकेची बोट अडकून सहा जण पाण्यात पडले. नगरसेवक आणि महापालिकेच्या कर्मचाऱ्यासह सहा जण पुराच्या पाण्यात पडले, सुदैवाने कोणतीही जीवितहानी झाली नाही.

नेमकं काय घडलं?

सांगलीतील पुराच्या पाण्यात बचाव कार्य करत असताना महापालिकेच्या बोटीला लाकडी ओंडक्यामुळे धक्का लागून बोटीचं पातं तुटलं आणि बोट पाण्यातच अडकली. यावेळी नगरसेवक मंगेश चव्हाण, दोन महापालिकेचे कर्मचारी, एक महिला आणि एक पुरुष असे सहा जण पुराच्या पाण्यात पडले.

सांगली कोल्हापूर रोडवरील हॉटेल उदय शेजारी ही घटना घडली. खांबाला बोट बांधून ठेवली असून सगळे जण बोटीतच अडकून पडले आहेत. दुर्दैवाने या अपघातात कोणतीही जीवितहानी झालेली नाही.

जयंत पाटलांचा सांगली दौरा

दरम्यान, कृष्णा नदीच्या पाणीपातळीत मोठी वाढ झाल्यामुळे नदीकाठची गावं आणि सांगली शहरात पूरस्थिती निर्माण झाली आहे. अशावेळी जिल्ह्याचे पालकमंत्री जयंत पाटील पाहणीसाठी रस्त्यावर उतरल्याचं पाहायला मिळत आहेत. अडचणीच्या ठिकाणी बाईकवरुन, तर काही ठिकाणी ट्रॅक्टरने, पाण्यात बोटीचा वापर करत जयंत पाटलांनी सांगलीतील पूरस्थितीची दिवसभर पाहणी करत समस्या जाणून घेतल्या आणि नागरिकांना धीर दिला.

जयंत पाटील यांनी जिल्ह्यातील जवळपास 15 पूरग्रस्त भागांना भेटी दिल्या. या पाहणीदरम्यान त्यांनी नागरिकांशी संवाद साधत नुकसानाची पाहणी केली. अडकलेल्या नागरिकांना सुरक्षित ठिकाणी नेण्याचा प्रयत्न केला. तसंच त्यांना जेवण आणि पिण्याच्या पाण्याची व्यवस्था केली. अधिकाऱ्यांसमवेत चर्चा करून योग्य त्या सूचनाही त्यांनी दिल्या.

संबंधित बातम्या :

अडचणीच्या ठिकाणी बाईकवरुन, काही ठिकाणी ट्रॅक्टर, पाण्यात बोटीचा वापर; जयंत पाटलांकडून सांगलीच्या पूरस्थितीची पाहणी

सरणार कधी रण? मरणानंतरही जीवाची अवहेलना, अकोल्यातील धक्कादायक प्रकार

(Sangli Flood Municipal Corporation Boat stuck near poll six falls in water)