शरद पवारांची प्रकृती बिघडली; पुण्याच्या रुबी हॉल क्लिनिकमध्ये उपचार सुरू
शरद पवार यांना आज सकाळी अचानक अस्वस्थता आणि थकवा जाणवू लागला. त्यानंतर डॉक्टरांच्या सल्ल्यानुसार त्यांना तातडीने रुग्णालयात हलवण्यात आले.
राष्ट्रवादी काँग्रेसचे ज्येष्ठ नेते शरद पवार यांची प्रकृती पुन्हा बिघडली आहे. त्यामुळे त्यांना पुण्यातील रुबी हॉल क्लिनिक (Ruby Hall Clinic) रुग्णालयात दाखल करण्यात आले आहे. गेल्या काही दिवसांपासून शरद पवारांना अशक्तपणा जाणवत आहे. त्यामुळे आता पुन्हा डॉक्टरांच्या सल्ल्यानुसार त्यांना रुग्णालयात अॅडमिट करण्यात आल्याची माहिती समोर आली आहे.
शरद पवारांना सलाईन लावले
मिळालेल्या माहितीनुसार, शरद पवार यांना थकवा आणि अशक्तपणाचा त्रास जाणवत आहे. त्यामुळे त्यांची प्रकृती खालवली आहे. शरद पवार यांना रुग्णालयात दाखल केल्यानंतर पुढील काही मिनिटांतच त्यांना सलाईन लावण्यात आले आहे. सध्या त्यांच्यावर लक्ष ठेवण्यासाठी डॉक्टरांची एक विशेष टीम तैनात करण्यात आली आहे. सध्या ते डॉक्टरांच्या देखरेखीखाली निरीक्षणाखाली आहेत.
सुप्रिया सुळे काय म्हणाल्या?
शरद पवार यांना रुग्णालयात दाखल केल्यानंतर त्यांच्या कन्या सुप्रिया सुळे यांनी याबद्दलची माहिती दिली आहे. आम्ही बाबांना पुन्हा पुण्यातील रुबी हॉल क्लिनिकमध्ये अॅडमिट केले आहे. त्यांना हायड्रेशनचा त्रास होत होता. त्यासोबतच त्यांच्या काही टेस्ट बाकी आहेत. त्यामुळे त्यांना आम्ही रुग्णालयात दाखल करत आहोत, अशी माहिती सुप्रिया सुळे यांनी दिली आहे. बाबांवर उपचार करणाऱ्या सर्व डॉक्टरांचे खूप खूप आभार, असेही सुप्रिया सुळेंनी त्यांच्या व्हॉटसअॅप स्टेटसद्वारे म्हटले आहे.
काही दिवस पूर्ण विश्रांती घेण्याचा सल्ला
दरम्यान मागील आठवड्यातही शरद पवार यांच्यावर याच रुग्णालयात उपचार करण्यात आले होते. त्यानंतर प्रकृतीत सुधारणा झाल्याने त्यांना डिस्चार्ज देण्यात आला होता. मात्र, पुन्हा अशक्तपणा जाणवू लागल्याने त्यांना रुग्णालयात दाखल व्हावे लागले. डॉक्टरांच्या देखरेखीखाली त्यांना पुढील काही दिवस पूर्ण विश्रांती घेण्याचा सल्ला दिला जाण्याची शक्यता वर्तवली जात आहे. आता पुढील वैद्यकीय तपासणीनंतरच त्यांच्या प्रकृतीबाबत अधिकृत माहिती समोर येणार आहे.
