म्यॉव म्यॉव करणारे मांजरासारखे लपलेत; दीपक केसरकरांची नितेश राणेंवर खोचक टीका

दीपक केसरकर

सिंधुदुर्ग: संतोष परब यांच्यावरील हल्ल्यानंतर कोकणातील राजकारण तापलं आहे. शिवसेनेचे नेते दीपक केसरकर यांनी या प्रकरणावरून नितेश राणेंवर जोरदार टीका केली आहे. म्यॉव म्यॉव करणारे मांजरासारखे लपून बसले आहेत, अशा शब्दात दीपक केसरकर यांनी नितेश राणेंवर जोरदार हल्ला चढवला आहे.

दीपक केसरकर यांनी नितेश राणे यांच्यावर जोरदार हल्ला चढवला आहे. जे मांजराची नक्कल करत होते. ते आता मांजरासारखे लपून बसले आहेत. आता हे लपून राहिले नाही. जे दुसऱ्यांना चिडवतात त्यांच्यावर देव कधी ना कधी अशी वेळ आणतोच, असं सांगतानाच ते वाघाला घाबरतात की नाही माहीत नाही. ते न्यायालयाला घाबरतात की नाही हे सुद्धा माहीत नाही. पण ते घाबरत आहेत. घाबरले आहेत आणि लपून बसले आहेत ही वस्तुस्थिती आहे, अशी खोचक टीका केसरकर यांनी केली आहे.

राणे पोलिसांना घाबरतात

नारायण राणे यांचा तोल गेलेला आहे. आपण किती शूर आहे हे राणे दाखवत असले तरी ते पोलिसांना घाबरतात. ही वस्तुस्थिती आहे. राणे यांची कालची पत्रकार परिषद आपल्या मुलाला वाचवण्यासाठी होती. कोण दीपक केसरकर विचारणारे नारायण राणे यांनी आपल्या मुलाच्या खासदारकीचा झालेला पराभव आठवावा. म्हणजे दीपक केसरकर कोण हे तुमच्या लक्षात येईल, असा हल्लाही त्यांनी चढवला.

तर नितेश यांच्याही राजकीय कारकिर्दीचा अंत होईल

नितेश राणे यांनी वेळीच सुधारावे. वेळीच सुधारले नाहीत तर राणेंचा जसा राजकिय अंत झाला तसाच त्यांच्या मुलांच्या राजकीय कारकिर्दीचा अंत होईल. विरोधी पक्ष नेत्यांनी विधान सभेत नितेश राणेंना झापलं. असा पोरकट पणा करू नका म्हणून सांगितलं. तरी सुद्धा तुम्ही तुमच्या मुलांवर नियंत्रण आणू शकला नाही, अशी टीकाही त्यांनी केली.

मी सर्वाधिक निधी आणला

तुम्ही मुख्यमंत्री होता. विरोधी पक्षनेता होता. पण गेल्या 25 वर्षात तुम्ही जिल्ह्यात जेवढा निधी आणू शकला नाही, तेवढा निधी मी पाच वर्षांत आणला, असा टोलाही त्यांनी लगावला.

संबंधित बातम्या:

12 आमदारांच्या निलंबनावर अजित पवार भाजपसोबत? 12 महिने कुणाला बाहेर न बसवण्याचं वक्तव्य

आदित्य ठाकरेंचा आवाज मांजरीसारखा आहे का? वाघाची मांजर कधी झाली? नारायण राणेंचा सवाल

VIDEO: कोण अजित पवार? मी नाही ओळखत अजित पवारांना?; नारायण राणे भडकले