उद्धव ठाकरेंशी गद्दारी? अरविंद सावंत यांनी थेट कागदावर लिहून दिलं… ऑपरेशन टायगरबाबत मोठी अपडेट

गेल्या काही वर्षांमध्ये राज्याच्या राजकारणात मोठा भूकंप पहायला मिळाले आहे. आधी शिवसेनेत बंडखोरी झाली आणि त्यानंतर राष्ट्रवादीत दोन गट पडले होते. त्यानंतर आता महाराष्ट्राच्या राजकारणात नवीन भूकंप होणार आणि उद्धव ठाकरेंचे खासदार एकनाथ शिंदे यांच्या शिवसेनेत प्रवेश करणार असल्याची चर्चा सुरू झाली आहे. उद्धव ठाकरे गटाचे आठ खासदार एकनाथ शिंदे यांच्या संपर्कात आहेत असं बोललं जात आहे. या बातम्यांच्या दरम्यान उद्धव ठाकरेंनी आज दक्षिण मुंबईचे खासदार अरविंद सावंत यांना मातोश्रीवर बोलावले होते. या दोघांमध्ये बैठक झाली. या बैठकीनंतर बोलताना अरविंद सावंत यांनी महत्त्वाची माहिती दिली आहे. सावंत नेमकं काय म्हणाले ते जाणून घेऊयात.

काय म्हणाले अरविंद सावंत ?

उद्धव ठाकरे यांची भेट घेतल्यानंतर अरविंद सावंत यांनी माध्यमांशी बोलताना म्हटले की, खासदार फुटणार याबाबत चर्चा झाली नाही, उलट त्यांनी माझं कौतुक केलं. आजच्या बैठकीत या विषयावर चर्चा होणार नव्हती. आजची बैठकी ही शिवसेना आणि भारतीय कामकार सेनेच्या कारभाराबाबत होती. तुम्हा सर्वांना कल्पना आहे की मी दैनंदिन मातोश्रीवर येतो. त्यांचा माझ्यावर विश्वास आहे, मातोश्रीचा विश्वास आहे.’

उद्धव ठाकरेंशी गद्दारी करणार नाही असं लिहून का दिलं?

अरविंद सावंत यांनी उद्धव ठाकरेंशी प्रताडणा करणार नाही असं लिहून दिलं आहे. याबाबत विचारले असता सांवंत म्हणाले की, ‘असा काही विषय झाला नाही, त्यांनी सहज म्हटलं की लिहून देणार का? मी म्हटलं लिहून देतो, त्यात असं काही विशेष नाही. मी हिंदू हृदयसम्राट बाळासाहेब ठाकरेंचा शिवसैनिक आहे. बोललो ते बोललो असं म्हणणाऱ्या बाळासाहेबांचा मी शिवसैनिक आहे. तुम्ही म्हणालं बोलला मग लिहून का दिलं? लिहून दिलं नसतं तर माध्यमांनी वेगळी बातमी पसरवली असती. त्यामुळे लिहून दिलं आहे.’

अरविंद सावंत ठाकरेंचे विश्वासू

अरविंद सावंत हे दक्षिण मुंबईतून तिसऱ्यांदा खासदार म्हणून निवडून लोकसभेवर गेले आहेत. 2014 पासून ते खासदार आहेत. उद्धव ठाकरे यांचे निकटवर्तीय, विश्वासू अशी त्यांची ओळख आहे. अनेक दिवसांपासून ठाकरे गटाचे खासदार एकनाथ शिंदे यांच्या शिवसेनेत सामील होणार अशा चर्चा आहेत. अनेक खासदारांनी काहीही झालं तरी शिंदेंच्या शिवसेनेत जाणार नाही असं सांगितलं. अधिवेशन काळात उद्धव ठाकरे यांनी सुद्धा खासदारांची मातोश्रीवर बैठक घेतली होती. खासदारांना मार्गदर्शन केलं होतं.