कळंबोलीतील सेंट जोसेफ शाळेत विद्यार्थ्यांना ख्रिश्चन धर्माची प्रार्थना म्हणण्याची सक्ती ? पालकांचा गंभीर आरोप

रवी खरात , रिपोर्टर : पनवेलच्या कळंबोली येथून एक महत्वाची बातमी समोर आली आहे. तेथील सेंट जोसेफ शाळेमध्ये विद्यार्थ्यांकडून ख्रिश्चन धर्माशी संबंधित प्रार्थना जबरदस्तीने म्हणवून घेतली जात आहे, असा आरोप काही पालकांनी केला आहे. येशूशी संबंधित प्रार्थना पाठ करून येण्याबाबत विद्यार्थ्यांच्या ग्रुपमध्ये संदेश जात आहे, असाही दावा पालकांकडून करण्यात येत आहे. यामुळे मोठी खळबळ माजली आहे. या आरोपानंतरं राष्ट्रवादी युवक काँग्रेसच्या पदाधिकाऱ्यांनी शाळा प्रशासनाच भेट घेतली आणि जाब विचारत याबाबत स्पष्टीकरण देण्याची मागणी केली आहे. मात्र असं असलं तरी सेंट जोसेफ शाळा प्रशासनाने यासंदर्भातील सर्व आरोप फेटाळून लावले आहेत. यामुळे नवा वाद पेटण्याची शक्यता आहे.

राष्ट्रवादी युवक काँग्रेसचे सचिव अक्षय देवकर यांनी या प्रकारावर आक्षेप घेतला आहे. शाळेतील विद्यार्थयांवर कोणत्याही विशिष्ट धर्माशी संबंधित प्रार्थना म्हणण्याची अथवा ती पाठ करण्याची सक्ती केली जाऊ नये, अशी मागणी देवकर यांनी केली. तसेच विद्यार्थ्यांच्या धार्मिक स्वातंत्र्याचा आणि पालकांच्या भावनांचा विचार करून शाळा प्रशासनाने या प्रकरणी स्पष्ट भूमिका मांडावी, अशी मागणी त्यांनी केली आहे. अन्यथा आंदोलनाचा इशाराही देण्यात आला आहे.

पालकांनी केले गंभीर आरोप

यासंदर्भात पालकांकडूनही गंभीर आरोप करण्यात आले आहेत. “ माझी मुलगी ही याच शाळेत शिकते. विद्यार्थ्यांकडून ही प्रार्थना जबरदस्तीने म्हणवून घेतली जाते. आमच्याकडे यासंदर्भातील रेकॉर्डिंग असून, त्यामध्ये विद्यार्थ्यांना येशूचं गाणं म्हणण्यास सांगितलं जात असल्याचे ऐकू येतंय,” असा दावा याप्रकरणी एका पालकाने केला.

दरम्यान, या आरोपांनंतर राष्ट्रवादी युवक काँग्रेसच्या कार्यकर्त्यांनी शाळा प्रशासनाकडे जाब विचारला आहे. विद्यार्थ्यांवर कोणत्याही विशिष्ट धर्माची प्रार्थना लादली जात असल्यास ती तातडीने थांबवावी, अशी मागणीत्यांनी केली. तसेच या प्रकरणी योग्य ती स्पष्टता दिली नाही तर आम्ही रस्त्यावर उतरून आंदोलन कर, असा इशाराही कार्यकर्त्यांनी दिला.

शाळा प्रशासनाने फेटाळले आरोप

मात्र पालक आणि राष्ट्रवादी युवक काँग्रेसने जे आरोप केलेत, शाळा प्रशाससाने ते फेटाळून लावले आहेत. आमच्या शाळेत कोणत्याही विशिष्ट धर्माचं नाव घेऊन प्रार्थना घेतली जात नाही, असा दावा प्रशासनाने केला आहे. मात्र, या प्रकरणाबाबत सविस्तर अधिकृत माहिती देण्यास शाळा प्रशासनाने नकार दिला आहे.