कल्याण रेल्वे पोलिसांची चमकदार कामगिरी, एका महिन्यात 1 कोटींचे 350 मोबाईल नागरिकांना परत

कल्याण : लोकलने प्रवास करताना जर तुमची एखादी वस्तू हरवली किंवा चोरीला गेली, तर ती परत मिळेल याची काही खात्री नसते. मात्र कल्याण रेल्वे पोलिसांनी गेल्या महिन्याभरातील चोरीला गेलेले किंवा हरवलेले जवळपास 350 मोबाईल परत केले आहेत. या सर्व मोबाईलची किंमत जवळपास 1 कोटी रुपयांच्या आसपास आहे. (Kalyan Railway Police Return 350 Mobile)

कल्याण रेल्वे पोलिस अंतर्गत कल्याण ते कसारा आणि कल्याण ते बदलापूर असा 84 किलोमीटरचा भाग येतो. या दरम्यान लाखो प्रवासी दररोज रेल्वेने प्रवास करतात. लॉकडाऊनपूर्वी आणि अनलॉकमध्ये काम सुरु करण्यात आले. मात्र या दरम्यान नागरिकांच्या वस्तू मोठ्या प्रमाणात हरवल्या, तर काहींच्या वस्तू चोरीला गेल्या. यानंतर कल्याण जीआरपीने वस्तू परत करण्याचे काम केले.

यानुसार कल्याण जीआरपी पोलिसांनी अवघ्या एका महिन्यात जवळपास एक कोटीचे ३५० मोबाईल परत केले आहेत. यामध्ये हरविलेले मोबाईल, चोरी गेलेले मोबाईल, फटका मारुन लुटलेले मोबाईल यांचा समावेश आहे.

दरम्यान यातील काही मोबाईल हे न्यायप्रविष्ट आहेत. त्यामुळे न्यायालयाद्वारे नागरिकांना ते परत मिळणार आहे. पोलिसांकडून मोठ्या प्रमाणात नागरिकांना मोबाईल परत करण्याचे काम सुरु आहे.

यासंदर्भात कल्याण जीआरपीचे वरिष्ठ पोलिस निरिक्षक वाल्मिक शार्दुल यांनी दिलेल्या माहितीनुसार, या महिन्यात 350 मोबाईल परत केले आहेत. यातील काहींचे पत्ते शोधून त्यांना घरी जात चोरीला किंवा हरविलेल्या वस्तू परत करण्यात आल्या आहेत. तर काहींना पोलीस ठाण्यात बोलावून त्यांच्या वस्तू परत केल्या आहेत.

वर्षभरात चोरी आणि हरविलेल्या 1700 वस्तू परत करण्यात आल्या आहेत. त्यामुळे नागरिकांनी पोलिसांच्या कामगिरीविषयी समधान व्यक्त केले आहे. (Kalyan Railway Police Return 350 Mobile)

संबंधित बातम्या : 

कल्याणमध्ये 350 घरांवर वन विभागाचा हातोडा, दीडशे घरं जमीनदोस्त, भाजप आमदार संतापताच कारवाईला स्थगिती

आजी-आजोबांची आठवण आली आणि ‘ती’ लोकलमध्ये बसली, पोलिसांच्या सतर्कतेमुळे सात वर्षाच्या चिमुरडीचा शोध