USDT स्वस्तात देण्याचं आमिष देऊन जयपूरला नेलं; २२ लाखांच्या खंडणीचा डाव अन्… नाशिकच्या तरुणासोबत काय घडलं?
Nashik Youth Kidnapping: कल्याण -ऑनलाइन गेमिंगच्या क्रिप्टो व्यवहारातून नाशिकच्या तरुणाचे अपहरण केले होते. यानंतर कल्याण रेल्वे पोलिसांनी हरियाणामध्ये मोठी कारवाई केली आहे.
ऑनलाइन गेमिंगच्या क्रिप्टो व्यवहारातून नाशिकच्या तरुणाचे अपहरण करण्यात आल्याची घटना उघडकीस आली आहे. या घटनेमुळे खळबळ उडाली आहे. नाशिकमधील एका २२ वर्षीय तरुणाला ऑनलाइन गेमिंगशी संबंधित क्रिप्टोकरन्सी व्यवहारासाठी जयपूरला बोलावून त्याचे अपहरण करण्यात आले होते. खंडणीसाठी त्याला ओलीस ठेवण्यात आले होते. त्यानंतर १९ ऑक्टोबर रोजी कल्याण सरकारी रेल्वे पोलीस आणि मुंबईतील गुन्हे शाखेच्या पथकाने त्याची हरियाणामधून सुटका केली आहे. या प्रकरणाचा धक्कादायक घटनाक्रम समोर आला आहे.
मिळालेल्या माहितीनुसार, या प्रकरणी पोलिसांनी नवीन आणि मंगला नावाच्या दोन संशयितांना अटक करून पुढील तपासासाठी जयपूरमधील प्रताप नगर पोलिसांच्या ताब्यात दिले. अपहरणकर्त्यांनी पीडिताकडे १५ लाख रुपये आणि त्याच्या प्रेयसीकडे ७ लाख रुपयांची मागणी केली होती. तसेच खंडणी न दिल्यास जीवे मारण्याची धमकी दिली होती. जेव्हा त्याच्या वडिलांनी पैसे जमवण्यास असमर्थता दर्शवली, तेव्हा आरोपींनी त्यांना घरातील सोने विकण्यास सांगितले. संशयितांनी व्हिडिओ कॉलद्वारे पीडिताच्या प्रेयसीशी संपर्क साधूनही पैशांची मागणी केली होती.
नील खेतिया असं पीडित तरुणाचं नाव आहे. पीडित तरुणाला ऑनलाइन गेमिंगचे व्यसन होते. गेममधील अतिरिक्त वैशिष्ट्ये खरेदी करण्यासाठी त्याला क्रिप्टोकरन्सी, विशेषतः USDT ची गरज होती. गुजरातमधील त्याच्या एका मित्राने त्याला सांगितले की, ऑनलाइन गेमिंग वापरकर्त्यांमध्ये प्रचलित असलेल्या सुमारे ९७ ते ९७.५० रुपयांच्या दराच्या तुलनेत तो USDT प्रति युनिट ९६.५० रुपयांना मिळवू शकतो. प्रति USDT ५० पैसे ते १ रुपया नफा कमावण्याच्या आमिषाने खेतियाने व्यवहार सुलभ करण्यासाठी संभाव्य खरेदीदारांशी ऑनलाइन संपर्क साधला आहे.
त्यानंतर त्यांच्यापैकी काहींनी त्याला एका सौद्यासाठी जयपूरला बोलावले. जिथे त्याचे अपहरण करण्यात आले. १२ ऑक्टोबर रोजी खेतिया राजस्थानला जाण्यापूर्वी शहरात त्याच्या प्रेयसीला भेटला. जेव्हा त्याने फोनला उत्तर देणे बंद केले, तेव्हा त्याच्या कुटुंबीयांनी त्याचा शोध सुरू केला. कल्याण जीआरपीकडे तक्रार दाखल करण्यात आली. अपहरणकर्त्यांनी त्याच्या वडिलांशी संपर्क साधला आणि पैसे न दिल्यास खेतियाला जीवे मारण्याची धमकी देत १५ लाख रुपयांची मागणी केली.
खंडणीच्या मागणीबद्दल कळल्यानंतर कल्याण जीआरपीने वरिष्ठ रेल्वे पोलीस अधिकाऱ्यांना सतर्क केले. त्यानंतर खेतियाला हरियाणात हलवण्यात आले. रेल्वे पोलिसांच्या सायबर टीमने त्याच्या ठिकाणाचा मागोवा घेत १९ ऑक्टोबर रोजी त्याचा शोध घेतला. दोन संशयितांना अटक केली. दोन्ही आरोपींना जयपूरमधील प्रताप नगर पोलिसांच्या ताब्यात देण्यात आले. ते पुढील तपास करत आहेत, अशी माहिती डीसीपी प्रज्ञा झेडगे यांनी दिली.
