दिल तो बच्चा हैं जी… CM विजय सर्वांसमोर खेळत बसले टॉय कार, सोशल मीडियावर VIDEO व्हायरल
CM Vijay Viral Video : तामिळनाडूचे मुख्यमंत्री आणि अभिनेते सी जोसेफ विजय हे साधेपणामुळे पुन्हा चर्चेत आले आहे. त्यांचा एक व्हिडिओ सोशल मीडियावर सध्या चर्चेचा विषय बनला आहे.
तामिळनाडूचे मुख्यमंत्री आणि अभिनेते सी जोसेफ विजय हे साधेपणामुळे पुन्हा चर्चेत आले आहे. त्यांचा एक व्हिडिओ सोशल मीडियावर सध्या चर्चेचा विषय बनला आहे. चेन्नईतील सचिवालयात व्हिएतनाममधील आघाडीची वाहन उत्पादक कंपनी विनफास्टच्या प्रतिनिधींशी झालेल्या अधिकृत बैठकीदरम्यानचा त्यांचा हा मोठ्या प्रमाणात व्हायरल होत आहे. या व्हिडिओमध्ये मुख्यमंत्री विजय एका छोट्याशा टॉय कारसोबत खेळताना दिसत आहेत. यावर आता त्यांच्या चाहत्यांनी वेगवेगळ्या प्रतिक्रिया दिल्या आहेत.
विनफास्टकडून विजय यांना खास भेट
तामिळनाडूमध्ये EV क्षेत्रातील गुंतवणूक आणि संधींबाबत चर्चा करण्यासाठी चेन्नई सचिवालयात विनफास्टच्या प्रतिनिधीमंडळासोबत बैठक आयोजित करण्यात आली होती. या बैठकीदरम्यान विनफास्ट एशिया ऑपरेशन्सचे व्यवस्थापकीय संचालक फाम सान्ह चाऊ यांनी मुख्यमंत्री विजय यांना त्यांच्या कंपनीच्या इलेक्ट्रिक कारचे अत्यंत बारकाईने तयार केलेले मिनिएचर (स्केल मॉडेल) भेट दिले.
विजय टॉय कार खेळण्यात मग्न
विनफास्टकडून ही भेट हातात मिळताच मुख्यमंत्री विजय काही क्षणांसाठी अधिकृततेचे सारे बंधन विसरून एखाद्या लहान मुलाप्रमाणे आनंदी झाले. त्यांनी हसत-हसत त्या छोट्या कारचे चारही दरवाजे उघडले, आत डोकावून तिचे इंटीरियर बारकाईने पाहिले आणि त्या मॉडेलची जवळून पाहणी केली. हा व्हिडिओ सोशल मीडियावर व्हायरल झाल्यानंतर चाहत्यांनी यावर प्रतिक्रिया दिली आहे. माणूस कितीही मोठ्या पदावर पोहोचला तरी टॉय कार पाहिल्यावर त्याच्यातील लहान मूल जागे होते अशी कमेंट एक चाहत्याने केली आहे.
मुख्यमंत्री विजय यांना भेट म्हणून देण्यात आलेले हे स्केल मॉडेल विनफास्टच्या लोकप्रिय इलेक्ट्रिक एसयूव्ही ‘VF 8’ चे होते. ही इलेक्ट्रिक SUV आंतरराष्ट्रीय बाजारात विक्रीसाठी उपलब्ध आहे.
विनफास्ट VF 8 ची वैशिष्ट्ये
या SUV च्या सेकंड जनरेशनच्या मॉडेलमध्ये 60.13 kWh क्षमतेची बॅटरी देण्यात आली आहे. फ्रंट अॅक्सलवर बसवलेली इलेक्ट्रिक मोटर 228 हॉर्सपॉवर (hp) इतकी शक्ती आणि 330 Nm टॉर्क निर्माण करते. एकदा पूर्ण चार्ज केल्यानंतर ही कार NEDC मानकांनुसार सुमारे 500 किमीपर्यंतची रेंज देते. कंपनीच्या दाव्यानुसार, ही कार 30 मिनिटांपेक्षा कमी वेळात 10% ते 70% पर्यंत चार्ज होऊ शकते. विशेष म्हणजे, या कारच्या जुन्या मॉडेलमध्ये 87.7 kWh क्षमतेची मोठी बॅटरी होती, जी 562 किमीपर्यंतची रेंज देत होती.
