निफाड तालुक्यातील नांदूर मधमेश्वरमध्ये सुमारे 400 कॉमन क्रेन पक्ष्यांचे आगमन
वातावरणात बदल झाला की अनेक पक्षी भारतात दाखल होतात आणि परदेशी पक्ष्यांचं सौंदर्या पाहण्यासाठी भारतीय नागरिकांनी गर्दी जमते. आता देखील निफाड तालुक्यातील नांदूर मधमेश्वरमध्ये सुमारे 400 कॉमन क्रेन पक्ष्यांचे आगमन झालं आहे. तर त्यांना पाहण्यासाठी नागरिकांनी मोठी गर्दी केली आहे.
रामसर दर्जा प्राप्त आणि महाराष्ट्राचे भरतपूर म्हणून ओळखल्या जाणाऱ्या नाशिकच्या निफाड तालुक्यातील नांदूर मधमेश्वर पक्षी अभयारण्यात सध्या पक्षीप्रेमींसाठी पर्वणी ठरावी असे दृश्य पाहायला मिळत आहे.
या अभयारण्यात सुमारे 400 च्या आसपास कॉमन क्रेन (Common Crane) पक्ष्यांचे आगमन झाले असून, त्यांच्या उपस्थितीमुळे परिसरातील जैवविविधतेत आणखी भर पडली आहे.
कॉमन क्रेन पक्ष्यांसोबतच नांदूर मधमेश्वर पक्षी अभयारण्यात विविध जातींचे रंगीत व स्थलांतरित असे सुमारे 40 हजारांहून अधिक पक्षी वास्तव्यास असल्याची माहिती आहे.
त्यामुळे देश-विदेशातून मोठ्या प्रमाणावर पक्षी निरीक्षक, पक्षीप्रेमी आणि छायाचित्रकार या ठिकाणी दाखल होत आहेत. आकाशात झेपावणाऱ्या कॉमन क्रेनच्या थव्यांनी नयनरम्य दृश्य निर्माण केले.
दरम्यान, सुमारे 400 कॉमन क्रेन पक्ष्यांचा थवा आकाशात झेपावताना दिसणारे खास टीव्ही नाईनच्या दर्शकांसाठी नयनरम्य दृश्य वन्यजीव व पक्षी छायाचित्रकार किशोर वडनेरे यांनी आपल्या कॅमेऱ्यात कैद केले आहे.
