‘तुंबाडची मंजुळा’ हिट होताच ओम भुतकरने उरकलं लग्न; कोण आहे पत्नी?
मुळशी पॅटर्न आणि तुंबाडची मंजुळा फेम अभिनेता ओम भुतकरने नुकतंच लग्न केलं आहे. या लग्नसोहळ्याचे फोटो सध्या सोशल मीडियावर व्हायरल होत असून त्याची पत्नी कोण आहे, हे जाणून घेण्यासाठी चाहते उत्सुक आहेत.
'मुळशी पॅटर्न', 'रावरंभा', 'न्यूड', 'तुंबाडची मंजुळा' यांसारख्या चित्रपटांमध्ये भूमिका साकारून घराघरात पोहोचलेला अभिनेता ओम भूतकर नुकताच लग्नबंधनात अडकला आहे. सोशल मीडियावर या लग्नाचे फोटो व्हायरल होत आहेत. ओमच्या लग्नाला मराठी कलाविश्वातील अनेक सेलिब्रिटी उपस्थित होते.
ओमच्या पत्नीचं नाव प्रेरणा सेठिया आहे. प्रेरणाच्या इन्स्टाग्राम अकाऊंटवरील बायोमध्ये दिलेल्या माहितीनुसार ती वाइल्डलाइफ कन्झर्वेशनिस्ट असल्याचं कळतंय. ओमचं इन्स्टाग्राम अकाऊंट प्रायव्हेट असल्याने त्याच्या खाजगी आयुष्याचे अपडेट्स फॉलोअर्सशिवाय इतरांना कळत नव्हते.
'तुंबाडची मंजुळा' या चित्रपटाच्या यशानंतर ओमने लग्न करत आयुष्याची नवी सुरुवात केली आहे. त्याच्या लग्नाला अभय महाजन, अलोक राजवाडे, पर्ण पेठे असे कलाकार उपस्थित होते. सोशल मीडियावर त्यांनी ओमच्या लग्नाचे फोटो शेअर करत त्याला शुभेच्छा दिल्या आहेत.
ओम भुतकरने 2004 मध्ये 'छोटा सिपाही' या हिंदी चित्रपटातून कलाक्षेत्रात पदार्पण केलं. या चित्रपटातील भूमिकेसाठी त्याला सर्वोत्कृष्ट बालकलाकाराचा राष्ट्रीय पुरस्कार मिळाला होता. ओम 'मघलूब' या टोपणनावाने उर्दूमध्ये तसंच मराठीत कविता लिहितो. 'सुखन' नावाच्या नाट्यप्रयोगांसाठीही तो ओळखला जातो.
प्रवीण तरडेंच्या 'मुळशी पॅटर्न' या चित्रपटामुळे त्याला खरी ओळख मिळाली आहे. तसंच 'न्यूड', 'देऊळ', 'फास्टर फेणे', 'लेथ जोशी' यांसारख्या चित्रपटांमध्येही त्याने दमदार भूमिका साकारल्या आहेत.
