ओटीटीवर 1 तास 56 मिनिटांच्या चित्रपटाचा धुमाकूळ, अवघ्या काही तासांत नंबर 1; आईच्या संघर्षाची थरारक कहाणी
OTT: अॅक्शन, भावनिक संघर्ष आणि आईच्या आपल्या मुलीसाठीच्या लढ्याची कथा यामुळे या चित्रपटाने ओटीटीवर चांगली सुरुवात केल्याचं चित्र दिसत आहे. ओटीटी प्लॅटफॉर्मवर हा चित्रपट पहिल्या क्रमांकावर ट्रेंड होत आहे.
बॉलिवूड अभिनेत्री तापसी पन्नूच्या नव्या चित्रपटाची सध्या जोरदार चर्चा सुरू आहे. तापसीची प्रमुख भूमिका असलेला ‘गांधारी’ हा अॅक्शन-क्राइम थ्रिलर 3 सप्टेंबर 2026 रोजी नेटफ्लिक्सवर प्रदर्शित झाला. रिलीज होताच या चित्रपटाने प्रेक्षकांचं लक्ष वेधून घेतलं असून, तो नेटफ्लिक्सच्या ट्रेंडिंग यादीत नंबर 1 वर पोहोचला आहे.
‘गांधारी’ची कथा एका आईभोवती फिरते. तापसी पन्नूने चित्रपटात बानी नावाच्या आईची भूमिका साकारली आहे. तिच्या मुलीचं अपहरण झाल्यानंतर ती मुलीचा शोध घेण्यासाठी कोणत्याही थराला जाण्यास तयार होते. या प्रवासात तिच्यासमोर अनेक धोकादायक अडथळे येतात. मात्र मुलीला परत मिळवण्याचा निर्धार तिच्या प्रत्येक अडचणीवर मात करण्याची ताकद देतो.
चित्रपटाची कथा केवळ अॅक्शनवर आधारित नसून त्यामध्ये आईच्या भावनिक संघर्षालाही महत्त्व देण्यात आलं आहे. एका आईला आपल्या मुलाच्या सुरक्षेबद्दल वाटणारी भीती आणि त्याच मुलासाठी कोणत्याही संकटाला सामोरं जाण्याची तिची तयारी हा या चित्रपटाचा भावनिक केंद्रबिंदू आहे.
‘गांधारी’मधून तापसी पन्नू पुन्हा एकदा अॅक्शन भूमिकेत दिसत आहे. बानीची भूमिका शारीरिकदृष्ट्या आव्हानात्मक असल्याचंही चित्रपटाच्या निर्मात्यांनी म्हटलं आहे. ‘गांधारी’ची पटकथा आणि निर्मिती कनिका ढिल्लन यांनी केली असून दिग्दर्शन देवाशीष मखीजा यांनी केलं आहे. तापसी आणि कनिका यांची ही पुन्हा एकत्र आलेली जोडी आहे. याआधी दोघांनी ‘हसीन दिलरुबा’ आणि ‘फिर आई हसीन दिलरुबा’सारख्या प्रोजेक्ट्सवर काम केलं आहे.
चित्रपटात तापसीसोबत इश्वाक सिंह, छाया कदम, स्वस्तिका मुखर्जी, मिता वशिष्ठ आणि जतिन सरना यांच्याही भूमिका आहेत. विशेष म्हणजे मराठमोळी अभिनेत्री छाया कदम यांनीही या चित्रपटात महत्त्वाची भूमिका साकारली आहे. त्यांच्या अभिनयासोबतच भूमिकेसाठी त्यांनी केलेल्या भाषेच्या तयारीचीही सोशल मीडियावर चर्चा झाली आहे.
