रक्तानं लिहिलेल्या पत्राद्वारे कार्यकर्त्याच्या अजित पवारांना शुभेच्छा! सच्च्या कार्यकर्त्याला अजितदादांचाही प्रेमाचा सल्ला

रक्तानं लिहिलेल्या पत्राद्वारे शुभेच्छा देणाऱ्या कार्यकर्त्याला अजित पवारांचा प्रेमाचा सल्ला

बारामती : विविध पक्षाचे कार्यकर्ते आपल्या नेत्याप्रति असलेलं प्रेम व्यक्त करण्यासाठी विविध क्लुप्त्या लढवत असतात. नेत्यांबद्दल असलेलं प्रेम, आदर व्यक्त करण्यासाठी कार्यकर्ते कधी टोकाचा मार्ग वापरताना दिसून येतात. उपमुख्यमंत्री अजित पवार यांचा असाच एक कार्यकर्ता पाहायला मिळतोय. अभिजीत काळे असं या कार्यकर्त्याचं नाव आहे. काळे हे बारामतीमधील माजी नगरसेवक आहेत. काळे यांनी स्वत:च्या रक्तानं लिहिलेल्या पत्राद्वारे अजित पवारांना शुभेच्छा दिल्यात. अजित पवार यांनीही आपल्या कार्यकर्त्याच्या शुभेच्छा तेवढ्याच प्रेमाने स्वीकारल्या. मात्र, त्यावेळी एक प्रेमाचा सल्ला द्यायलाही अजितदादा विसरले नाहीत. (Deputy CM Ajit Pawar’s advice to party workers)

बारामतीतील माजी नगरसेवक अभिजीत काळे यांनी आपल्या रक्तानं उपमुख्यमंत्री अजित पवार यांच्यासाठी शुभेच्छा पत्र लिहिलं होतं. हे पत्र काळे यांनी आज अजित पवार यांना भेट दिलं. यावेळी अजितदादांची कार्यकर्त्यांबाबत असलेली आस्था बारामतीकरांना अनुभवायला मिळाली. मात्र, अजित पवार यांनीही आपल्या कार्यकर्त्याला सल्ला दिलाय. “अरे तुमचं माझ्यावर प्रेम आहे; पण असं नाही करायचं”, असा सल्ला देत अजितदादांनी कार्यकर्त्याच्या शुभेच्छा स्वीकारल्या. स्पष्टवक्ता, परखड आणि शिस्तप्रिय म्हणून अजितदादांची राज्यात ओळख आहे. मात्र कार्यकर्त्यांबद्दल आस्था बाळगणारे अजितदादा आज बारामतीकरांना पुन्हा एकदा अनुभवायला मिळाले.

स्थानिक स्वराज्य संस्था निवडणुकीबाबत अजितदादांचं महत्वाचं वक्तव्य

राज्यात महाविकास आघाडीच्या रुपात शिवसेना, राष्ट्रवादी आणि काँग्रेस एकत्र असले तरी स्थानिक पातळीवर हे पक्ष स्वतंत्र लढण्याचीच शक्यता अधिक आहे. अशावेळी राष्ट्रवादी काँग्रेसचे नेते आणि उपमुख्यमंत्री अजित पवार यांनी महत्वाचं वक्तव्य केलंय. प्रत्येकाला आपला पक्ष वाढवण्याची मुभा आहे. स्थानिक स्वराज्य संस्थेबाबत त्या त्या जिल्ह्यात अधिकारी देणार असल्याचं अजित पवार म्हणाले.

प्रत्येकाला आपला पक्ष वाढवण्याची मुभा आहे. सद्यस्थितीत राष्ट्रवादी काँग्रेस, काँग्रेस आणि शिवसेना एकत्र सरकार चालवत आहेतत. राज्य स्तरावरच्या आणि इतर महत्वाच्या निवडणुका लढवण्याबाबत वरिष्ठ पातळीवरचे नेते निर्णय घेतात. स्थानिक स्वराज्य संस्थेबाबत त्या त्या जिल्हात अधिकार देणार. याबाबत उद्धव ठाकरे, एकनाथ शिंदे, अशोक चव्हाण, बाळासाहेब थोरात, जयंत पाटील, छगन भुजबळ आम्ही सर्वजण बैठक घेऊन निवडणुकाबाबत दिशा ठरवू, असं अजित पवार म्हणाले.

पिंपरी-चिंचवड लाचखोरी प्रकरणात सूडबुद्धीने कारवाई नाही

पिंपरी-चिंचवड महापालिकेतील स्थायी समिती अध्यक्षांसह 4 जणांवर लाचलुचपत प्रतिबंधक विभागानं कारवाई केलीय. या कारवाईबाबत महापालिकेतील सत्ताधारी भाजपकडून हे राजकीय षडयंत्र असल्याचा आरोप करण्यात येतोय. विरोधकांच्या या आरोपांना अजित पवार यांनी उत्तर दिलं आहे. ही कारवाई सूडबुद्धीने झालेली नाही. जर तुम्ही भ्रष्टाचार केला नाही तर तुम्ही त्यात सापडू शकता का? असा सवाल अजित पवार यांनी उपस्थित केलाय. सूडबुद्धीनं कारवाई हे चुकीचं वक्तव्य आहे. त्याला काही अर्थ नाही, असं अजित पवार म्हणाले.

इतर बातम्या :

पिंपरी-चिंचवड लाचखोरी प्रकरणात सूडबुद्धीने कारवाई नाही, विरोधकांच्या आरोपांना अजित पवारांचं उत्तर

स्टंटबाजी कशाला करताय, आमचीही तीच भूमिका, पडळकरांच्या बैलगाडा शर्यतीनंतर अजित पवारांचं मोठं भाष्य

Deputy CM Ajit Pawar’s advice to party workers