काम घोळत न ठेवता थेट निर्णय ही दादांची स्टाईल, अजित पवारांच्या भेटीनंतर रोहित पवारांची प्रतिक्रिया

अहमदनगर : “कोणतंही काम घोळत न ठेवता थेट निर्णय घेण्याची दादांची स्टाईल असून ती मला भावते”, अशा शब्दात कर्जत-जामखेड मतदारसंघाचे आमदार रोहित पवार यांनी उपमुख्यमंत्री अजित पवार यांचं कौतुक केलं आहे (Rohit Pawar meet Ajit Pawar). रोहित पवार यांनी आज (18 ऑगस्ट) अजित पवार यांची भेट घेतली. विशेष म्हणजे राष्ट्रवादी काँग्रेसचे अध्यक्ष शरद पवार यांनी नातू पार्थ पवार यांच्यावर केलेल्या टीकेनंतर अजित पवार आणि रोहित पवार यांच्यातील ही पहिली भेट होती (Rohit Pawar meet Ajit Pawar).

रोहित पवार यांनी ट्विटरवर अजित पवार यांच्या भेटीची माहिती दिली आहे. मतदारसंघातील आणि इतर प्रश्नांसंबंधित चर्चा करण्यासाठी अजित पवार यांची भेट घेतल्याची माहिती त्यांनी दिली. मात्र, या भेटीमागील खरा उद्देश अजून समोर आलेला नाही.

“मतदारसंघातील आणि इतर प्रश्नांबाबत चर्चा करण्यासाठी उपमुख्यमंत्री अजित पवार यांना भेटलो. त्यांनी प्रश्न बारकाईने समजून घेत त्यावर सकारात्मक निर्णय घेण्याचं आश्वासन दिलं. कोणतंही काम घोळत न ठेवता थेट निर्णय घेण्याची दादांची स्टाईल असून ती मला भावते. त्यानुसार या प्रश्नांवरही निर्णय होईल, अशी अपेक्षा आहे”, असं रोहित पवार म्हणाले.

शरद पवार यांनी पार्थ पवार यांच्यावर प्रसारमाध्यमांसमोर टीका केल्यानंतर पवार कुटुंबात तणावाचे वातावरण निर्माण झाले होते. मात्र, हे तणावाचे वातावरण दोन दिवसात निवळेल, अशी माहिती पवार कुटुंबातील सदस्यांनी 15 ऑगस्ट रोजी दिली होती. अजित पवार यांचे बंधू श्रीनिवास पवार यांच्या निवासस्थानी 15 ऑगस्ट रोजी पवार कुटुंबियांची बैठक पार पडली. या बैठकीनंतर पवार कुटुंबातील सदस्यांनी याबाबत माहिती दिली होती. त्यानंतर आज रोहित पवार यांनी अजित पवार यांची भेट घेतली. या भेटीनंतर रोहित पवार यांनी ट्विटरवर याबाबत माहिती देत पार्थ पवार संबंधित वादावर पडदा टाकण्याचा प्रयत्न करण्यात आला आहे.