मी पडलो तर पडलो, माझ्या मतदारसंघात पुन्हा निवडणुका घ्या : उदयनराजे
"माझ्या मतदारसंघात पुन्हा एकदा निवडणूक लावा. ती जुन्या पध्दतीने बॅलेट पेपरवर घ्या. मी पडलो तर पडलो पण ही देशाला लागलेली कीड वेळेत काढली नाही तर देशाला सावरण अवघड होईल", असं उदयनराजे म्हणाले.
सातारा : साताऱ्याचे खासदार उदयनराजे भोसले ईव्हीएमबाबत आक्रमक झाले आहेत. ईव्हीएम बंद करुन जुन्या पद्धतीने बॅलेट पेपरवर मतदान प्रकिया सुरु करण्याची मागणी त्यांनी केली आहे. इतकंच नाही तर “माझ्या मतदारसंघात पुन्हा एकदा निवडणूक लावा. ती जुन्या पध्दतीने बॅलेट पेपरवर घ्या. मी पडलो तर पडलो पण ही देशाला लागलेली कीड वेळेत काढली नाही तर देशाला सावरण अवघड होईल”, असं उदयनराजे म्हणाले.
रडीचा डाव उदयनराजे खेळत नाही. मी विजयी झालो आहे. पण EVM मुळे 376 मतदारसंघात उमेदवार पराभूत झाले आहेत, असा आरोप उदयनराजेंनी केला. EVM वर साडेचार हजार कोटी खर्च होणार असतील तर लहान मुलांकडून चिठ्या काढून आमदार-खासदार निवडा असा टोला, उदयनराजेंनी निवडणूक आयोगाला लगावला.
उदयनराजे भोसलेंनी EVM आणि बॅलेट पेपरवर येणाऱ्या खर्चाची तुलना केली. देशात EVM वर सरकार साडेचार हजार कोटीहून अधिक विनाकारण खर्च करत असल्याचा आरोप उदयनराजेंनी केला.
सातारा लोकसभा मतदारसंघ
काँग्रेस-राष्ट्रवादी आघाडीचे उमेदवार छत्रपती उदयनराजे भोसले यांनी पुन्हा एकदा सातारा लोकसभा मतदारसंघात विजय मिळवला. उदयनराजेंना 5 लाख 79 हजार 26 मतं, तर शिवसेनेचे उमेदवार नरेंद्र पाटील यांना 4 लाख 52 हजार498 मतं मिळाली. उदयनराजे भोसले यांनी मागील 2014 च्या निवडणुकीत जवळपास साडेतीन लाख मतांनी विजय मिळवला होता. मात्र यंदा त्यांची आघाडी निम्म्याने घटली आहे. 2014 मध्ये उदयनराजे भोसले 3 लाख 66 हजार 594 मतांनी विजयी झाले होते. यंदा उदयनराजेंना इतकं लीड घेता आलं नाही. 2019 च्या निवडणुकीत राजेंना 1,26,528 मतांनी विजय मिळवता आला.
VIDEO:
संबंधित बातम्या