Vaibhav Sooryavanshi: चांगला खेळतोय म्हणून लगेच सतत संधी द्याची का? वैभव सूर्यवंशीबद्दल गौतम गंभीर यांचे खोचक विधान
भारताचे मुख्य प्रशिक्षक गौतम गंभीर यांनी एक विधान केले आहे. वैभव सूर्यवंशीला संघात सतत का संधी मिळत नाही असा प्रश्न विचारला असतान त्य़ांनी काय उत्तर दिले ते पाहा...
Vaibhav Sooryavanshi: वयाच्या १५ व्या वर्षी आंतरराष्ट्रीय स्तरावर पदार्पण करून इतिहास रचणारा वैभव सूर्यवंशी सध्या नेहमी चर्चेत असतो. त्याला कधी संधी मिळते तर कधी संधी मिळत नाही. इतकी प्रतिभा असूनही त्याला वारंवार संघात स्थान मिळत नाही. आता वैभवला वारंवार संधी का दिली जात नाही असा प्रश्न विचारला असतामुख्य प्रशिक्षक गौतम गंभीर यांनी जे उत्तर दिलं त्याची चर्चा होत आहे.
या वर्षाच्या सुरुवातीला, वैभवने पदार्पण केले. त्याने इंग्लंडविरुद्ध टी-२० पदार्पण करताना सचिन तेंडुलकरचा प्रदीर्घ काळापासूनचा विक्रम मोडला. नंतर झिम्बाब्वेविरुद्ध अर्धशतक झळकावून आंतरराष्ट्रीय क्रिकेटमध्ये अर्धशतक करणारा सर्वात तरुण फलंदाज बनला. अफगाणिस्तानविरुद्धच्या मालिकेत आणि आशिया कपच्या सलामीच्या सामन्यांमध्ये त्याला अंतिम ११ खेळाडूंमध्ये स्थान मिळाले नाही, ज्यामुळे अनेक प्रश्न निर्माण झाले.
गंभीर यांनी त्याच्या अनुपस्थितीचे कारण स्पष्ट केले आणि सांगितले की, “केवळ चांगल्या फॉर्ममध्ये असण्याने संघात स्थान मिळण्याची हमी नसते. संघ व्यवस्थापन आणि दीर्घकाळ संघात असलेल्या अनुभवी खेळाडूंना सुरक्षितता प्रदान करणे हे सर्वोच्च प्राधान्य आहे. हा माझ्यासाठीही एक नवीन अनुभव होता. तो खूप चांगल्या फॉर्ममध्ये होता, पण मी त्याला समजावून सांगितले की, जे खेळाडू बऱ्याच काळापासून संघासाठी चांगली कामगिरी करत आहेत, त्यांच्यामुळे कधीकधी तुला तुझ्या संधीची वाट पाहावी लागते आणि एक गोष्ट स्पष्ट आहे, सोशल मीडिया किंवा बाहेरील चर्चांमुळे प्लेइंग इलेव्हन ठरत नाहीत.”
संजू सॅमसन आणि अभिषेक शर्मा यांची उदाहरणे देत गंभीर म्हणाला की, “गेल्या दीड ते दोन वर्षांत प्रभाव पाडलेल्या खेळाडूंना तीन-चार अपयशांच्या आधारावर संघातून वगळता येणार नाही. जर वैभव आज खेळला, तर ज्या खेळाडूला वगळायचे आहे, मग तो अभिषेक असो किंवा संजू, त्याच्यासोबत माझी एक कठीण चर्चा होईल. त्यामुळे, गेल्या दीड ते दोन वर्षांत इतका प्रभाव पाडलेल्या जोडीकडे आपण अचानक दुर्लक्ष करू शकत नाही. आम्हाला ड्रेसिंग रूममध्ये ते संरक्षक वातावरण निर्माण करायचे आहे.”
संधी मिळाल्यावर वैभवने पुन्हा एकदा स्वतःला सिद्ध केले. श्रीलंकेविरुद्धच्या आशियाई क्रीडा स्पर्धेच्या उपांत्य फेरीत पुनरागमन करताना त्याने २१ चेंडूंमध्ये ३८ धावांची महत्त्वपूर्ण खेळी केली. त्यानंतर पाकिस्तानविरुद्धच्या अंतिम सामन्यात ९ चेंडूंमध्ये १५ धावा करून त्याने संघाच्या विजयात योगदान दिले, ज्यामुळे भारताला १९ धावांनी सामना जिंकून सुवर्णपदक मिळवता आले.
