IND vs NZ 2nd T20: गंभीरचे ते शब्द अन तिलकने टीम इंडियाला जिंकवून दिली मॅच, मॅचनंतर भावूक झाला अन् म्हणाला…

Tilak Verma IND vs NZ 2nd T20 Match: क्राइस्टचर्चमधील हॅगली ओव्हलवर झालेल्या दुसऱ्या टी२० सामन्यात भारताने न्यूझीलंडला चार गडी राखून पराभूत करत पाच सामन्यांच्या मालिकेत २-० अशी भक्कम आघाडी घेतली. न्यूझीलंडने दिलेल्या १८१ धावांच्या लक्ष्याचा पाठलाग करताना भारताने हा सामना जिंकला. एका क्षणी, भारतीय संघाने सुरुवातीलाच पाच गडी गमावले होते आणि सामना अत्यंत बिकट परिस्थितीत होता. युवा फलंदाज तिलक वर्माने आपल्या शानदार आणि हुशार खेळीने सामन्याचे चित्र पालटले. तिलक वर्माच्या खेळीचे सर्वत्र कौतुक होत आहे. तिलकला या खेळीनंतर सामनावीर पुरस्कार मिळाला. सामन्यानंतर तिलक वर्मा काय म्हणाला ते पाहा…

सामन्यानंतर, तिलक वर्माने आपल्या दमदार खेळीबद्दल आणि ड्रेसिंग रूममध्ये झालेल्या संभाषणांबद्दल सांगितले, ज्यामुळे मैदानावर त्याचे मनोधैर्य वाढले. प्रशिक्षक गौतम गंभीर यांच्याशी झालेल्या संभाषणाबद्दल बोलताना तो भावूक झाला. सामनावीर म्हणून निवड झाल्यानंतर बोलताना, तिलकने भावूक होऊन सांगितले की, “सामन्याच्या अगदी आधी मी प्रशिक्षक गौतम सर आणि सितांशु कोटक सर यांच्याशी संवाद साधला होता. त्यांनी मला फक्त एकच गोष्ट सांगितली आम्हाला सर्वांचा तुझ्यावर विश्वास आहे आणि संपूर्ण देशाचा तुझ्यावर विश्वास आहे. जर तू शेवटपर्यंत क्रीजवर टिकून राहिलास, तर तू सामना जिंकवशील. माझ्या मनात फक्त हीच एक गोष्ट होती आणि मला सामना शक्य तितका पुढे न्यायचा होता.”

नमन धीरसोबतच्या आपल्या भागीदारीचा उल्लेख करत तिलक म्हणाला की,” खेळपट्टी थोडी संथ होती, त्यामुळे मी आणि नमनने फिरकी गोलंदाजांविरुद्ध चौकार मारण्याची आणि धावा करत राहण्याची रणनीती आखली. मी आणि नमनने चार ते पाच वेळा प्रत्येकी दोन धावा घेतल्या, ज्या संघासाठी निर्णायक ठरल्या.”

अखेरीस, तिलकने नितीश कुमार रेड्डीसोबत सामना संपवला. तिलक हसत म्हणाला की,” आज हैदराबादचे मुले (नितीश आणि ते स्वतः) मैदानावर उत्कृष्ट कामगिरी करताना दिसले आणि ते संघाला विजयापर्यंत नेऊ शकले याचा मला खूप आनंद झाला.”