IND vs NZ: टीम इंडियाविरुद्धचा पराभव किवीच्या जिव्हारी लागला, किवीने थेट संघ बदलला, तीन लोकांना तातडीने काढून टाकलं

IND vs NZ T20 Series: भारत विरुद्ध न्यूझीलंड यांच्यातील पाच सामन्यांच्या टी२० मालिकेतील तिसरा सामना मंगळवार, २७ ऑक्टोबर रोजी वेलिंग्टन येथे खेळवला जाणार आहे. या सामन्यापूर्वी किवी संघाने आपल्या संघात अनेक बदल केले आहेत. लॉकी फर्ग्युसन तिसरा टी२० सामना खेळणार नाही आणि तो चौथ्या व पाचव्या सामन्यांसाठी संघात परत येईल. मॅट हेन्री देखील संपूर्ण मालिकेतून बाहेर झाला असून तो आता थेट भारताविरुद्धच्या एकदिवसीय मालिकेत सहभागी होईल. न्यूझीलंड संघात इतरही अनेक बदल झाले आहेत.

न्यूझीलंड क्रिकेटनुसार, भारताविरुद्धच्या तिसऱ्या टी२० सामन्यापूर्वी नियोजित कार्यभार व्यवस्थापनामुळे अनेक खेळाडूंची बदली केली जाईल. लॉकी फर्ग्युसन आज ऑकलंडसाठी रवाना होईल आणि ईडन पार्क व सेडन पार्क येथे होणाऱ्या अंतिम दोन टी२० सामन्यांसाठी संघात परत येईल. ब्लेअर टिकनर वेलिंग्टनमध्ये तिसऱ्या ते पाचव्या सामन्यांसाठी टी२० आंतरराष्ट्रीय संघात सामील होईल, तर त्याचा सेंट्रल स्टॅग्स संघातील सहकारी जोश क्लार्कसन ऑकलंडमध्ये चौथ्या आणि पाचव्या टी२० सामन्यांसाठी संघात सामील होईल. मॅट फिशर केवळ तिसऱ्या टी२० सामन्यासाठी राखीव खेळाडू म्हणून संघासोबत वेलिंग्टनला जाईल आणि बुधवारी लिंकन युनिव्हर्सिटी येथे न्यूझीलंड ‘अ’ संघात परत येईल.

दुसऱ्या टी२० सामन्यात, तिलक वर्माच्या (५१ नाबाद) अर्धशतकाच्या आणि नितीश कुमार रेड्डीसोबत (२६ नाबाद) सातव्या विकेटसाठी ३० चेंडूंमध्ये केलेल्या ६९ धावांच्या अभेद्य भागीदारी केली आहे.  या जोरावर न्यूझीलंडविरुद्ध एक चेंडू शिल्लक असताना चार गडी राखून रोमांचक विजय नोंदवला. १५ व्या षटकात ११२ धावांत सहा गडी गमावल्यानंतर संघ अडचणीत असताना तिलक (२६ चेंडू, सहा चौकार, एक षटकार) आणि नितीश कुमार (१३ चेंडू, एक चौकार, एक षटकार) यांनी सूत्रे हाती घेतली. मात्र, या जोडीने सावधपणे आणि संयमाने फलंदाजी करत १९.५ षटकांत ६ गडी गमावून १८१ धावा केल्या आणि पाच सामन्यांच्या मालिकेत भारताला २-० अशी आघाडी मिळवून दिली.

कर्णधार मिचेल सँटनरच्या (४ षटकांत ४/२१) उत्कृष्ट गोलंदाजीमुळे न्यूझीलंड एके वेळी विजयाच्या दिशेने वाटचाल करत होता. पण तिलकने फिनिशरची भूमिका बजावत त्यांच्या हातून सामना हिसकावून घेतला. भारतीय गोलंदाजांनी पहिल्या सामन्यापेक्षा चांगली कामगिरी केली, पण ग्लेन फिलिप्स (७०) आणि बेव्हॉन जेकब्स (५६) यांच्या अर्धशतकांच्या जोरावर यजमानांनी ५ गडी गमावून १८० धावांची भक्कम धावसंख्या उभारली. भारताची सुरुवात चांगली झाली नाही, कारण सुरुवातीला नियमित अंतराने त्यांच्या विकेट्स पडत होत्या. मधल्या फळीतील फलंदाज नमन धीरने ३१ धावा, अभिषेक शर्माने २७ धावा, संजू सॅमसनने १४ धावा आणि अक्षर पटेलने ११ धावा केल्या.