Rishabh Pant: ऋषभ पंतच्या अपघातप्रकरणी नवी अपडेट; NHAI अधिकाऱ्याने केला मोठा खुलासा
ऋषभ पंतचा अपघात खड्ड्यामुळे? अपघातासंदर्भात आता NHAI अधिकाऱ्याने दिली महत्त्वपूर्ण माहिती
हरिद्वार: कार अपघातात गंभीर जखमी झालेला क्रिकेटर ऋषभ पंत याच्या प्रकृतीत हळूहळू सुधारणा होत आहे. सोमवारी त्याला आयसीयू विभागातून बाहेर हलवण्यात आलं. कार अपघातात गंभीर जखमी झाल्यानंतर पंतला शुक्रवारी देहरादूनमधील मॅक्स रुग्णालयात दाखल करण्यात आलं होतं. रस्त्यावरील खड्डा चुकवताना ऋषभचा कारवरील ताबा सुटला आणि अपघात घडला, असं उत्तराखंडचे मुख्यमंत्री पुष्कर सिंग धामी यांनी रविवारी रुग्णालयात पंतची भेट घेतल्यानंतर माध्यमांशी बोलताना सांगितलं. यावर आता भारतीय राष्ट्रीय राजमार्ग प्राधिकरणच्या (NHAI) एका अधिकाऱ्याने महत्त्वपूर्ण माहिती दिली आहे.
NHAI अधिकारी प्रदीप सिंह गुसाईं म्हणाले, “ज्या ठिकाणी ऋषभ पंतचा अपघात झाला, तिथे कोणताच खड्डा नव्हता. पंतची कार जिथे रेलिंगला धडकली, तिथं हायवेला लागूनच कालवा (रजवाहा) असल्याने तो रस्ता अरुंद आहे. सिंचनासाठी तो कालवा वापरला जातो.”
NHAI ने दुर्घटनास्थळावरील खड्डे बुजवल्याच्या चर्चांनाही गुसाईं यांनी फेटाळलं. रविवारी संध्याकाळी या हायवेच्या दुरुस्तीचं काम करणाऱ्या कामगारांचे काही फोटो सोशल मीडियावर व्हायरल झाले होते.
उत्तराखंडचे मुख्यमंत्री धामी यांनी मॅक्स रुग्णालयात पंतची भेट घेतली होती. या भेटीनंतर माध्यमांशी बोलताना त्यांनी सांगितलं की “रस्त्यावरील खड्डा किंवा काहीतरी काळसर दिसणारी गोष्ट चुकवताना कारचा ताबा सुटला असं ऋषभने सांगितलं.” दिल्ली जिल्हा क्रिकेट संघटनेचे (डीडीसीए) संचालक श्याम शर्मा यांनीही पंतची रुग्णालयात भेट घेतली होती. त्यांनीसुद्धा माध्यमांशी बोलताना खड्ड्याचा उल्लेख केला होता.
ऋषभ पंतच्या प्रकृतीत लक्षणीय सुधारणा
“ऋषभची प्रकृती एकदम चांगली आहे. त्याच्या प्रकृतीत झपाट्याने सुधारणा दिसल्यामुळे रविवारी रात्रीच त्याला आयसीयू विभागातून बाहेर हलविण्यात आलं. मात्र ऋषभच्या पायाला होणाऱ्या वेदना अजूनही कायम आहेत. त्याची एमआरआय चाचणी करण्याचा अद्याप विचार नाही”, अशी माहिती ऋषभवर उपचार करणाऱ्या डॉक्टरांनी दिली.
