लंच ब्रेकमध्ये महिला चहा प्यायला गेली, होऊन आली 16 कोटींची मालकीण, पण ऑफिसमध्ये येताच…

एक महिला ऑफिसमध्ये असताना चहा प्यायला गेली आणि तब्बल 16 कोटींची मालकीण होऊन आली… पण कसं? असा प्रश्न तुम्हाला देखील बसला असेल.. तर त्या महिलेसोबत काय झालं जाणून घ्या. अमेरिकेतील व्हर्जिनियामध्ये राहणाऱ्या या महिलेचा तो दिवस इतर दिवसांसारखाच सामान्यपणे सुरू झाला होता. पण, त्या दिवशी ती काहीशी तणावात होती आणि कामाच्या वेळेत दुपारचे जेवण घेण्यासाठी बाहेर पडली होती. कदाचित तिलाही अंदाज नव्हता की हा छोटासा ब्रेक तिच्या आयुष्यातील सर्वात मोठी आनंदाची बातमी घेऊन येणार आहे. महिला जेवण्यासाठी ‘लव फूड मार्ट’ नावाच्या दुकानात पोहोचली. तिथे तिने 20 डॉलर्सचे ‘प्लॅटिनम 7s’ स्क्रॅच-ऑफ तिकीट विकत घेतलं. तिकीट खरेदी करणं तिच्यासाठी कोणतीही मोठी गोष्ट नव्हती. तिने फक्त नशीब आजमावण्यासाठी कार्ड घेतलं आणि दुकानामध्येच ते स्क्रॅच करण्यास सुरुवात केली.

‘पीपल मॅगझीन’नुसार, महिला जशीजशी तिकीट स्क्रॅच करत गेली, तशी तिला जाणीव होऊ लागली की काहीतरी मोठं घडलं आहे. शेवटी तिला समजलं की, तिकिटवर सर्वात मोठा जॅकपॉट लागला आहे. म्हणजेच तिने 2 दशलक्ष डॉलर्सची लॉटरी जिंकली होती. भारतीय रुपयांमध्ये ही रक्कम जवळपास 17 कोटी रुपये होते. इतकी मोठी रक्कम जिंकल्यानंतर कोणत्याही माणसाच्या आनंदाला पारावार उरणार नाही. कोणी कुटुंबाला फोन करेल, कोणी मित्रांना सांगेल आणि कोणी कदाचित त्याच क्षणी नोकरीचा राजीनामा देण्याचा विचार करेल. पण या महिलेने असं काहीही केलं नाही. ती पुन्हा ऑफिसमध्ये आली आणि राहिलेलं काम करु लागली.

या प्रकरणात लक्ष वेधणारी सर्वात मोठी गोष्ट म्हणजे, तुमच्याकडे असं तिकीट असेल ज्याची किंमत कोटी रुपयांची आहे आणि तुम्हाला माहीत असेल की तुमचं आयुष्य काहीच वेळात पूर्णपणे बदलणार आहे. असं असतानाही तुम्हाला तुमच्या ऑफिसमध्ये परत जाऊन काम करावं लागेल… महिलेने तेच केले. तिने तिकीट स्वतःजवळ सुरक्षित ठेवलं आणि आपली शिफ्ट पूर्ण केली. तिने ना ऑफिसमध्ये कोणत्याही प्रकारचा गोंधळ घातला आणि ना लगेच नोकरी सोडण्याचा निर्णय घेतला.

महिलेसमोर होते दोन पर्याय…

जॅकपॉट जिंकल्यानंतर त्या महिलेकडे रक्कम घेण्यासाठी दोन पर्याय होते. पहिला पर्याय असा होता की तिला संपूर्ण 2 कोटी डॉलर्सची रक्कम 30 वर्षांमध्ये वार्षिक हप्त्यांच्या स्वरूपात मिळाली असती. दुसरा पर्याय असा होता की ती संपूर्ण रकमेची एकरकमी कॅश पेमेंट घेऊ शकली असती. अशात महिलेने दुसरा पर्याय निवडला. टॅक्स कापण्यापूर्वी तिला 9,52,000 डॉलर्स म्हणजेच सुमारे 8 कोटी रुपये मिळतात. म्हणजेच कागदावर जिंकलेली रक्कम 2 दशलक्ष डॉलर्सची होती, पण कॅशचा पर्याय निवडल्यामुळे तिच्या हातात टॅक्स कापण्यापूर्वी 9,52,000 डॉलर्स आले. पण महिलेने तिची ओळख लपवली आहे. त्यामुळे ती कोणत्या ऑफिसमध्ये काम करते आणि कुठे राहते याबद्दल कोणतीच अधिकृत माहिती समोर आलेली नाही.