जुलै-सप्टेंबरमध्ये 8 प्रमुख शहरांत घरांची विक्री 59 टक्क्यांनी वाढली, जाणून घ्या कारण काय?

नवी दिल्लीः चालू आर्थिक वर्षाच्या जुलै-सप्टेंबर तिमाहीत देशाच्या आठ प्रमुख शहरांमध्ये घरांची विक्री 59 % वाढून वर्ष-दर-वर्ष आधारावर 55,907 युनिट झाली. PropTiger.com ने ही माहिती दिली. पूर्वीच्या म्हणजे जून तिमाहीच्या तुलनेत सप्टेंबर तिमाहीत घरांची मागणी तीन पटीने वाढली. हाऊसिंग ब्रोकरेज कंपनी प्रोपटीगरने म्हटले आहे की, साथीच्या दुसऱ्या लाटेनंतर आता रिअल इस्टेट मार्केटमध्ये सुधारणा होत आहे. गेल्या वर्षी जुलै-सप्टेंबरमध्ये घरांची विक्री 35,132 युनिट आणि या वर्षी जून तिमाहीत 15,968 युनिट झाली. विविध मालमत्ता सल्लागारांकडून घरांच्या विक्रीबाबतचा हा चौथा तिमाही अहवाल आहे. जुलै-सप्टेंबरमध्ये वार्षिक आणि त्रैमासिक आधारावर घरांची विक्री वाढली, असंही अहवाल दर्शवतो.

या कारणांमुळे घरांची विक्री वाढली

Housing.com, PropTiger.com आणि Makaan.com चे ग्रुप चीफ एक्झिक्युटिव्ह ऑफिसर (CEO) ध्रुव अग्रवाल म्हणाले की, कमी व्याजदर, निवासी मालमत्तेच्या किमतींमध्ये घट आणि कोविड साथीच्या दरम्यान आपले स्वतःचे घर खरेदी करण्याच्या संकल्पनेमुळे सुधारणा झाली आहे.

कोणत्या शहरांमध्ये किती विक्री?

प्रोपटीगरच्या मते, अहमदाबादमध्ये जुलै-सप्टेंबर तिमाहीत घरांची विक्री 64 टक्क्यांनी वाढून 5,483 युनिट झाली, जी वर्षभरापूर्वीच्या 3,339 युनिट्स होती. बंगळुरूमध्ये ती 36 टक्क्यांनी वाढून 4,825 युनिट्सवरून 6,547 युनिट्सवर पोहोचली. चेन्नईमध्ये घरांची विक्री दुप्पट होऊन 4,665 युनिट झाली. त्याच वेळी दिल्ली-एनसीआर बाजारात घरांची विक्री 4,458 युनिट्सवर जवळजवळ स्थिर राहिली. गेल्या वर्षी याच कालावधीत येथील घरांची विक्री 4,427 युनिट होती. हैदराबादमध्ये घरांची विक्री दुप्पट होऊन 7,812 युनिट झाली. कोलकातामध्ये ते 7 टक्के वाढीसह 2,651 युनिट्सवर होते. मुंबईतील घरांची विक्री 92 टक्क्यांनी वाढून 7,378 युनिट्सवरून 14,163 युनिट्स झाली. पुण्यात घरांची विक्री 43 टक्क्यांनी वाढून 10,128 युनिट झाली. वर्षभरापूर्वी याच कालावधीत ते 7,107 युनिट्सवर होते.

1 वर्षात मालमत्तेच्या किमतीत 25% पर्यंत वाढ

देशातील टियर -2 शहरांमध्ये गेल्या एका वर्षात किमती 10 ते 25 टक्क्यांनी वाढल्यात. येत्या सहा महिन्यांत यात आणखी 15 टक्क्यांची वाढ अपेक्षित असल्याचे क्षेत्रातील तज्ज्ञांचे मत आहे. यामध्ये सर्वाधिक वाढ मध्य प्रदेशातील इंदूरमध्ये झाली. राज्याची व्यावसायिक राजधानी असलेल्या इंदूरमध्ये 20 ते 25 टक्के मालमत्तांच्या किमतीत सर्वाधिक वाढ झाली. यासोबतच चंदीगड, रायपूर, जयपूर आणि बंगळुरू येथील घरांच्या किमतीत 10 टक्क्यांहून अधिक वाढ दिसून आली.

संबंधित बातम्या

ऑनलाईन मनी ट्रान्सफर करताय, मग NEFT, RTGS आणि IMPS मध्ये काय फरक?

चुकून दुसऱ्याच्या खात्यात रक्कम गेल्यास कशी परत मिळवाल, RBI चे नियम काय?