Nashik : सहलीच्या गाडीचे ब्रेक फेल, चालकाचा चलाखपणा कामी आला, नागरिकांसह पोलिसांनी केलं कौतुक
शर्मा टूर्स अँड ट्रॅव्हलची बस होती. पोलिसांनी क्रेनच्या सहाय्याने गाडी बाजूला करुन परिस्थिती नियंत्रणात आणली. मागच्या अनेक दिवसांपासून नाशिक जिल्ह्यात सतत अपघात होत आहेत.
शैलेश पुरोहित, नाशिक : इगतपुरी (Nashik Igatpuri) तालुक्यात असलेल्या पूर्व भागातील नाशिक नगर या दोन जिल्ह्यांना जोडणारा म्हैसवळण घाटात (maisvalan ghat) शाळेतील सहलीच्या बसचा अपघात झाला. हा अपघात ब्रेक फेल झाल्यामुळे झाला असल्याचे सांगितले जात आहे. चालकाने दाखवलेल्या चलाखपणामुळे विद्यार्थी (Student) थोडक्यात बचावले असल्याची संपुर्ण नाशिकमध्ये चर्चा आहे. बसमध्ये 40 विद्यार्थी होते. त्यापैकी चार विद्यार्थी गंभीर आहेत, आणि दहा विद्यार्थी जखमी झाल्याची माहिती पोलिसांनी दिली आहे.
शैक्षणिक सहलीच्या बसचा अपघात झाल्याची माहिती समजल्यानंतर नागरिकांनी घटनास्थळी धाव घेतली. त्याचबरोबर एसएमबीटी रुग्णालयातील रुग्णवाहिका बोलावून विद्यार्थ्यांना रुग्णालयात उपचारासाठी दाखल करण्यात आलं
इस्कॉन मंदिर संस्थेकडून चाळीस विद्यार्थी टाकेद तीर्थावर सहलीसाठी आले होते. त्यानंतर त्यांनी विश्रामगड (पट्टाकिल्ला) परिसराला भेट दिली. परतीच्या प्रवासात नाशिक नगर जिल्हा सरहद्दीवर वाघोबा जवळ गाडीचे ब्रेक फेल झाल्याचे चालकाच्या लक्षात आले. त्यावेळी चालकाने चलाखपणा दाखवला आणि बस डोंगराच्या एका बाजूला घुसवली. त्यामुळे कसल्याची प्रकारची जीवितहानी झाली नाही. गाडी पलटी झाली, त्यामध्ये चार विद्यार्थ्यांना गंभीर दुखापत झाली आहे. तर दहा विद्यार्थी जखमी झाले आहेत.
शर्मा टूर्स अँड ट्रॅव्हलची बस होती. पोलिसांनी क्रेनच्या सहाय्याने गाडी बाजूला करुन परिस्थिती नियंत्रणात आणली. मागच्या अनेक दिवसांपासून नाशिक जिल्ह्यात सतत अपघात होत आहेत. चालकाचे नागरिकांनी, पालकांनी आणि पोलिसांनी सुध्दा कौतुक केलं आहे. या सगळ्या प्रकरणाची पोलिस कसून चौकशी करीत आहेत.