आंघोळ करताना महिला पोलीस अधिकाऱ्याचा व्हिडीओ, पोलीस कॉन्स्टेबलकडून ब्लॅकमेलिंग

प्रातिनिधीक फोटो

भोपाळ : मध्य प्रदेशमध्ये आंघोळ करताना महिला पोलीस अधिकाऱ्याचा व्हिडीओ बनवल्याचे प्रकरण समोर आले आहे. महिला पोलीस अधिकाऱ्याच्या ड्रायव्हरनेच हा व्हिडीओ बनवल्याचा आरोप आहे. भोपाळ पोलिसांच्या गुन्हे शाखेने आरोपी पोलीस कॉन्स्टेबलच्या विरोधात गुन्हा दाखल केला आहे. आता त्याच्या शोधासाठी छापे टाकले जात आहेत.

काय आहे प्रकरण?

भोपाळ पोलिसांच्या गुन्हे शाखेने एका पोलीस कॉन्स्टेबलच्या विरोधात एका महिला पोलीस अधिकाऱ्याचा आंघोळ करताना व्हिडीओ काढून तिला ब्लॅकमेल करण्याचा प्रयत्न केल्याच्या आरोपाखाली गुन्हा दाखल केला आहे. आरोपी कॉन्स्टेबलचे नाव भूपेंद्र सिंह असे आहे. तो तक्रारदार महिला पोलीस अधिकाऱ्याचा वाहन चालक म्हणून तैनात होता.

बाथरुमच्या दाराखाली मोबाईल कॅमेरा

गुन्हे शाखेच्या अधिकाऱ्यांनी दिलेल्या माहितीनुसार, महिला अधिकाऱ्याने आपल्या तक्रारीत आरोप केला आहे की, 22 सप्टेंबरला ती आंघोळ करत असताना कोणीतरी तिचे चित्रीकरण करण्याचा प्रयत्न करत असल्याचे तिला समजले. पीडित महिला अधिकाऱ्याने तिच्या बाथरुमच्या दाराखाली मोबाईल कॅमेरा पाहिला. त्या बाहेर येताच आरोपी घटनास्थळावरून पळून गेला.

पोलीस कॉन्स्टेबलकडून पैशांची मागणी

महिला अधिकाऱ्याने आरोप केला की, 26 सप्टेंबर रोजी चालक तिच्या घरी आला आणि तिच्याकडून 5 लाख रुपयांची मागणी केली आणि तसे न केल्यास तिला सोशल मीडियावर बदनाम करण्याची धमकी दिली. महिला अधिकाऱ्याने सुरुवातीला एसपी मुख्यालयाशी संपर्क साधला, ज्यांनी शहराच्या गुन्हे शाखेला प्राथमिक तपासात सहभागी करुन घेतले.

आरोपी पसार, शोध सुरु

आरोपी पोलिस कॉन्स्टेबलवर भारतीय दंड संहितेच्या संबंधित कलमांखाली आणि आयटी कायद्याच्या अनेक कलमांखाली ब्लॅकमेलिंग आणि खंडणीचा गुन्हा दाखल करण्यात आला आहे. सध्या आरोपी फरार आहे. त्याने गुन्हे शाखेशी संपर्क साधण्याचा प्रयत्न केल्याचे सांगितले जात आहे.

नागपुरातही बाथ व्हिडीओ 

दरम्यान, तरुणीचा आंघोळ करतानाचा व्हिडीओ शूट केल्याचा धक्कादायक प्रकार याआधी नागपुरात उघडकीस आला होता. अल्पवयीन शेजाऱ्याने हा प्रताप केला होता. पोलिसांनी समज देऊन अल्पवयीन मुलाला पालकांच्या ताब्यात दिलं होतं. नागपूरमधील तहसील पोलीस स्टेशन हद्दीत ही खळबळजनक घटना घडली होती.

बाथ व्हिडीओचे स्क्रीनशॅाट व्हायरल

अल्पवयीन शेजाऱ्याने तरुणीचा आंघोळ करतानाचा व्हिडीओ शूट केला होता. या आक्षेपार्ह व्हिडीओतील काही स्क्रीनशॅाट म्हणजेच फोटो काढून त्याने सोशल मीडियावर व्हायरल केले होते. हा प्रकार समजल्यानंतर तरुणीला धक्काच बसला. तिने पोलिसात या प्रकरणी तक्रार दाखल केली. नागपूरमधील तहसील पोलीस स्टेशनमध्ये या प्रकरणी विनयभंगाचा गुन्हा दाखल करण्यात आला आहे. आरोपी 17 वर्षांचा असल्यामुळे पोलिसांकडून सूचनापत्र देऊन त्याला पालकांच्या ताब्यात देण्यात आले.

निर्जन रस्त्यावर अश्लील चाळे

दरम्यान, नागपूरमधील जरीपटका भागातून पायी घरी जाणाऱ्या महिलेला पत्ता विचारण्याच्या बहाण्याने थांबवून तिच्याशी अश्लील चाळे करणाऱ्या तरुणाला गेल्याच महिन्यात अटक करण्यात आली. यावेळी आरोपी सुरजने पादचारी महिलेला पत्ता विचारण्याच्या बहाण्याने थांबवले. आजूबाजूला कुणी नसल्याचे पाहून त्याने तिच्याशी अश्लील चाळे करण्यास सुरुवात केली. महिलेने आरडाओरड केल्यामुळे तो पळून गेला.

संबंधित बातम्या :

तरुणी आंघोळ करताना व्हिडीओ शूट, धमकावून अपहरण करत अत्याचार, नागपुरातील प्रकार

पत्ता विचारण्याच्या बहाण्याने महिलेशी अश्लील चाळे, इंजिनिअरिंग विद्यार्थ्याला अटक

तरुणी आंघोळ करताना व्हिडीओ शूट, स्क्रीनशॉट व्हायरल, नागपुरात अल्पवयीन शेजाऱ्याचा प्रताप