बाहेर फिरायला जाऊया सांगून मुलांना घेऊन गेला, दोन चिमुकल्यांसह विष प्राशन केले

औरंगाबाद : अज्ञात कारणातून एका कामगाराने आपल्या दोन मुलांना विष पाजून स्वतःही आत्महत्या केल्याची धक्कादायक घटना औरंगाबादमध्ये उघडकीस आली आहे. या घटनेत वडिलांचा मृत्यू झाला आहे तर दोन्ही मुलांवर औरंगाबाद जिल्हा रुग्णालयात उपचार सुरु आहेत. भागवत पंजाजी काळे असे मयत कामगाराचे नाव आहे. याप्रकरणी औरंगाबादेतील सिडको पोलीस ठाण्यात आकस्मिक मृत्यूची नोंद करण्यात आली आहे. दरम्यान या कामगाराने जीवन संपवण्याचे टोकाचे पाऊल का उचलले याबाबत अद्याप कळू शकले नाही.

मयत इसम एका कंपनीत नोकरी करतो

भागवत काळे हा 34 वर्षीय कामगार औरंगाबादमधील एका कंपनीत नोकरी करतो. शनिवारी सकाळी तो आपल्या दोन मुलांना बाहेर फिरायला घेऊन जातो सांगत घरातून घेऊन गेला. यानंतर तो मुलांना घेऊन अंबड रस्त्यावर गेला.

आधी मुलांना विष पाजले मग स्वतः प्यायला

अंबड रस्त्यावर नेऊन त्याने आधी दोन्ही मुलांना विष पाजले, मग स्वतःही विष प्राशन केले. घटनेची माहिती मिळताच सिडको पोलीस घटनास्थळी दाखल झाले. पोलिसांनी दोन्ही मुलांना सिव्हिल रुग्णालयात उपचारासाठी दाखल केले.

कारण अद्याप अनभिज्ञ

बापाचा मृत्यू झाल्याने त्याचा मृतदेह शवविच्छेदनासाठी रुग्णालयात पाठवला. कामगाराने असे टोकाचे पाऊल का उचलले याबाबत अद्याप कळू शकले नाही. पोलीस याबाबत अधिक तपास करत आहेत.

सांगलीत 32 विद्यार्थ्यांना विषबाधा

शालेय पोषण आहारातून सांगलीत 32 शाळकरी विद्यार्थ्यांना विषबाधा झाल्याची घटना उघडकीस आली. सर्व विद्यार्थ्यांना उपचारासाठी सिव्हि रुग्णालयात दाखल करण्यात आले. सर्व विद्यार्थ्यांची प्रकृती स्थिर आहे. डाळ-भात खाल्ल्यानंतर विद्यार्थ्यांना उलट्या, मळमळ होऊ लागले.