आरेनंतर मालाडमध्ये रिक्षात महिलेचा विनयभंग, पोलिसांनी 12 तासात आरोपीच्या मुसक्या आवळल्या !
महिलांवरील अत्याचाराच्या घटना थांबण्याचे नावच घेताना दिसत नाहीत. दिवसाढवळ्या भररस्त्यातही महिलांवर अत्याचार होत आहेत. यावरुन गुन्हेगारांना पोलिसांचा धाकच राहिला नसल्याचे दिसते.
मुंबई : गोरेगावमधील आरेमध्ये महिलेचा विनयभंग केल्याची घटना उघडकीस आल्यानंतर आता पुन्हा मालाड येथे अशीच घटना घडली आहे. एक महिला रिक्षातून कुठेतरी चालली होती. यावेळी मालाड पश्चिमेतील जैन मंदिरासमोर एका अज्ञात इसमाने रिक्षातच महिलेचा विनयभंग केला. याप्रकरणी महिलेने मालाड पोलिसात धाव घेत तक्रार दाखल केली. महिलेच्या तक्रारीवरुन मालाड पोलिसांनी गुन्हा नोंदवत 12 तासाच्या आत आरोपीला अटक केली. मालाड पोलिसांनी भादवी कलम 354 अंतर्गत गुन्हा दाखल केला आहे. याप्रकरणी पोलीस अधिक तपास करत आहेत.
काय आहे प्रकरण?
पीडित महिला 7 जुलै रोजी मालाड पश्चिमेतील आनंद रोडवरुन रिक्षाने प्रवास करत होती. जैन मंदिरसमोर सकाळी 9.55 वाजण्याच्या सुमारास एका अनोळखी इसमाने रिक्षात हात घालून महिलेचा विनयभंग केला. दिवसाढवळ्या गर्दीच्या ठिकाणी घडलेल्या या घटनेमुळे खळबळ उडाली. महिलेने मालाड पोलिसात धाव घेत याबाबत तक्रार नोंदवली. गुन्हा दाखल झाल्यानंतर 6 तासात पोलिसांनी कसून शोध घेत मालाड परिसरातून आरोपीच्या मुसक्या आवळल्या.
वसईत भररस्त्यात महिलेला मारहाण
भररस्त्यात एका महिलेला मारहाण केल्याची घटना वसईत उघडकीस आली आहे. मारहाणीची घटना सीसीटीव्हीत कैद झाली असून, हा व्हिडिओ सोशल मीडियावर चांगलाच व्हायरल झाला आहे. महिलेच्या काखेत एक मूल आहे. एक पुरुष त्या महिलेला क्रूर पद्धतीने मारहाण करत आहे. रविवारी वसई पश्चिमेला स्टेशन रोडवर ही घटना घडली.
काही वेळाने 2 ते 3 महिला पीडितेच्या मदतीला धावून आल्या. हा पुरुष कोण आहे? त्या महिलेला मारहाण का करत आहे? याबाबत माहिती मिळाली नाही. मात्र भरदिवसा सार्वजनिक ठिकाणी खुलेआम होणाऱ्या महिला अत्याचाराच्या घटनांमुळे महिलांचा सुरक्षा ऐरणीवर आहे.
